Amabandla ezombusazwe aphume ijumo ngoMgqibelo eqinisa imikhankaso yawo yokhetho ngesikhathi sokusele amaviki amabili kuphela ukuthi kuvotwe.
Umkhokheli webandla lePeople’s Democratic Party njalo eyisiphathamandla seMDC Alliance uMnu. Tendai Biti ugcizelele amazwi omkhokheli walumanyano uMnu. Nelson Chamisa awokuthi yibo abazamemezela impumela yokhetho ngoba inhlanganiso ebona ngokuqhutshwa kokhetho eye Zimbabwe Electoral Commission ayisoze ikwenze lokhu kunganqoba ibandla eliphikisayo “njengenhlalayenza.”
Ngakwelinye icele, umongameli Mnangagwa ubesenkonzweni yamapostoli eye Johane Marange Apostolic church eMafararikwa eBocha eManicaland lapho athembise amalunga ensonto le ukuthi uzathuthukisa inhlelo zabo zokulima. Inkokheli yalelibandla ibikwa isithi kusobala ukuthi nguye ozanqoba kukhetho oluzayo. Umsekeli kamongameli Mnangagwa kuhulumende lakubandla leZANU PF, uMnu. Constantino Chiwenga uqhube umhlangano we rally elokitshini elidala eleMbare eharare, lapho athe uhulumende uzadiliza izindlu kulindawo, akhe ezintsha eziqinileyo ukwenzela ukuthi abantu behlale kuhle.
Ibandla leMDC-T elikhokhelwa nguNkosazana Thokozani Khuphe lithi libe le road show edolobheni lakoBulawayo.
Kusenjalo, umkhokheli webandla leMthwakazi Republic Party uMnu. Mqondisi Moyo uthi bebese Bubi besekela ilunga lebandla labo uNkosazana Zenzele Gumede ozancintisa kukhetho lwamakhansili kulesi isigaba.
Inhlanganiso ezilwela amalungelo oluntu ezigxile koBulawayo zimanyene zahlanganisa abantu emavinkilini eMasimini Shopping Centre eCowdray Park ukuthi bezozithokozisa ngasikhathi sinye bekhuthazwa ukuthi bephume ngobunengi babo bayevota ngelanga lokhetho.