amalinks wokungena

Breaking News

Amabandla Alobelana Isivumelwano Sokuqhuba Ukhetho Kungeladlakela


UMnu. Welshman Ncube uloba isivumelwano samabandla eHarare esokukhankasela ukhetho ngokuthula.

Amabandla ezombusazwe aphikisayo kwele Zimbabwe athi ukuthula ngesikhathi sokhetho kusezandleni zikahulumende webandla leZANU PF.

Athi ibandla leli lilamandla okumanyanisa uzulu ngokutshiyana lomkhuba wokusebenzisa abebutho ukwethusela abantu elizweni ikakhulu abemaphandleni ukuba bavotele iZANU PF.

Lokhu kuphume emhlanganweni owenzelwe eHarare ngabe khomishini ebona ngokukhumisana umlotha eye National Peace and Reconciliation (NPRC) wona obe ujonge ukuqinisa isinqumo sokusebenzela ukuthula ngesikhathi sokhetho esivunyelanwe ngamabandla wonke azancintisa kukhetho oluzakwenziwa mhlaka 30 ngoNtulikazi lonyaka.

Ekhuluma kulowo mhlangano, isikhulumeli seMDC Alliance, uMnu Welshman Ncube, uthe ukuze isinqumo lesi sibe lesithunzi, uhulumende kumele abe nguye okhokhelayo ekusebenzeleni ukuthi kube lokuthula elizweni.

"Ekuthatheni lesi sinqumo sokusebenzela ukuthula kufanele sikhumbuzane ukuthi ukuze kube lokuthula umlando lo uhleli kuhulumende ukuba awuthwale abone ukuba konke okwenza uzulu ahlale esesaba akusekho. Inengi lento ezenza uzulu ayesabe akufuni mali kodwa ukuba uhulumende atshiye umkhuba wokwekela izakhamizi zisethuselwa,"

UMfundisi Useni Sibanda usekele amazwi kaNcube esithi, “Lokhu ukuzinikela ukuthula okwenzakale lamuhla kuqakathekile kakhulu ngenxa yokuthi wonke amapolitical parties abekhona lohulumende ubekhona, lamabandla atshiyeneyo, ama church ebekhona njalo yikho okokuqala ukuba kwenzakale into enje njalo ukuthi siyazinikela njengabantu beZimbabwe ukuthi sibe lokhetho olulokuthula.

“Kuqakatheke kakhulu nxa sikhangelane lesimo esenzakale koBulawayo ukuthi sekuqakathekile ukuthi wonke umuntu ose Zimbabwe angazinikeli kuphela kodwa asebenzele ukuthi kube lokuthula,"

Omunye obesemhlanganweni lo nguMnu. Lovemore Madhuku yena okhokhelela ibandla leNational Constitutional Assembly owazise ukuthi umhlangano lo ubanikeza ithuba lokuthi bakhankase kulokuthula elizweni.

“Lokhu kusinika ithuba lokuthi singene kwezombusazwe singesabi ngenxa yokuthi ezombusazwe kuleli bekuyinto eyisihluku ikakhulu sibona ukuthi bekuyimbangela yokuthi uphelelwe yimpilo, ubulalelwe inotho yakho kumbe izihlobo zakho.

“Isinqumo lesi sibona angani sizenelisa ukuba ezombusazwe zibe ngesinye nje isigaba esinjengokuya esikolo kumbe emsebenzini kungela kwesaba njalo thina njenge bandla elincane silakho ukuba senelise ukwandisa abasekeli bethu nxa kulokuthula.

“Bekufanele kube kwenzakala inyanga ezihlanu kungakafiki ukhetho ukuba uzulu laye abelethemba ukuba uhulumende ukhuluma ngenhliziyo yonke udaba lokuletha ukuthula njalo kube lokhetho oluthuliyo"

Obe emele uMongameli Emmerson Mnangagwa lebandla leZANU PF, uMnu Obert Mpofu, wazise ukuba njengebandla udlakela kabaluthandi njalo bazazama ngazo zonke indlela ukuthi lungabi khona ekhethweni lwalonyaka.

“Kulezinye inkokheli ezithanda ukukhuluma ngodlakela olwenzakala ngesikhathi esedluleyo emulini ezalahlakelwayo kodwa zingazange zehlelwe ludlakela. Mina lwangehlela singakatholi uzibuse langesikhathi sesimtholile. Kufanele njengenkokheli sitshiyane lokuvula izilonda lezo kodwa sizithobe.”

Kusenjalo umkhokheli we bandla le #1980 Movement, uMnu Francis Dinha, ubotshwe ngamapholisa emhlanganweni lo ngemva kokubanga umsindo esithi ibandla lakhe alikho kumabandla akhethwe ukuba alobe igama kusivumelwano lesinqumo sokuthula lesi.

Udaba Esilethulelwe NguGibson Bhebhe
please wait

No media source currently available

0:00 0:05:20 0:00

Facebook Forum

XS
SM
MD
LG