amalinks wokungena

Breaking News

Bakhala Ngokuswelakala Kwamabhasi Okuthwala Uzulu Lokumanyana Kwenkampani yeZUPCO leNRZ


ZUPCO FARES HARARE4

Uzulu koBulawayo uthi imizamo kaHulumende yokulungisisa udubo lokusilela kwezimotha ezithwala abantu iyancomeka kodwa ethi ukhathazwa ngumango okumele awuhambe elanda ukugada izitimela esezasungula umsebenzi wokuthwala abantu zincedisana lamabhasi aweZupco.

Abantu bakhala njalo ngokuba khatshana kwendawo lapho abehlela khona zitimela lezi sebephindela emakhaya bevela emsebenzini.

Inkampani kaloliwe eyeNational Railways of Zimbabwe (NRZ) isimanyene leyamabhasi eyeZimbabwe United Passenger Company (ZUPCO) ukuba iphathise uzulu ngendlela zokuhamba ngemva kokuba uzulu ekhanye ehlupheka kakhulu ngokusilela kwamabhasi.

Umhlali wakoBulawayo, uMnu. Mthokozisi Msipha, uthi lanxa uhulumende esenza yonke limizamo, ngokwengezelela indlela zokuhambisa, udubo lukhona.

“Ilizwe lethu selisinika uZupco train,ibeyisimanga kithi ukuthi isitimela sesingatshintsha sibe nguZupco njalo esikufunayo yitransport. Okusalayo yikuthi isitshiya khatshana izigebenga ngoba abanye bamiswa imisebenzi. lgovernment isincedile ngokwengezelela kodwa iservice kwesinye isikhathi uthi uyasigada isitimela ufika ufika eMpopoma Station sesifile wena uya ecoudry Park uyafika sikhathi bani ngo1 ebusuku kumbe ucine usulala esitimeleni.”

UNkosikazi Nomsa Hadebe, isakhamuzi sakoBulawayo, uthi kathembi ukuba izitimela ezikhona zingenelisa ukuthwala abantu okwesikhathi eside ngoba sezigugile.

“Izitimela ezinengi zifile ngoba nxa kungela isitimela esitsha khathesi lesikhathi esezihlezi ngakhona amboni kungaba lesitimela esingayenza sitshove abantu for 1 month.ltransport esitimeleni kuseceleni ngoba kumele uvuke sikhathi bani ukuze ubambe isikhathi uyeyehlela ngaphi usebenzela kuthird,itransport yesitimela iyabe ibhadaleka kodwa ukuthi iyekufikisa ngesikhathi akuhambelani.”

UNkosikazi Patricia Tshabalala, umsekeli kamgcinisihlalo weBulawayo Progressive Residents Association, uthi izitimela zadalelwe imango emide.

“Nxa sikhangelane lohlupho lwetransport koBulawayo okwezitimela lokhu uhulumende azama ukuthi akwenze shuwa its a non stater. Akusoze kusebenze ngoba isitimela sehlisela emain Station njalo kulomango lapha engisigadela khona kanti kuzangisizangani ukuthi ngiyesigada.Anguboni kubhadala lokhu okwezitimela okukahulumende, izitimela zikhangelelwe ukuya khatshana hayikhona umuntu oya emsebenzini.”

Isakhumuzi sakoBulawayo eCoudry Park unkosikazi Senzeni mthupha uthi kaluboni uncedo lwesitimela.

“Sikhuluma ngoZupco stimela lowu asazi ukuthi uzabe ehamba njani eCowdry Park siyabe sihamba o1 hour sisiya esitimeleni. Mina kwelami icele nginona kungcono yikuthi bengezelele amabhasi siyabe sikhatshana kuqeda lapho basifakela amabhasi afileyo kuyiyo elabantu abanengi,lokhu okwesitimela hayi.”

UMongameli Emmerson Mnangagwa lamuhla wethule umbiko othi uhulumende wengezelele amabhasi kaZupco ngangamatshumi amahlanu (50). E-Harare isitimela sesiqalile ukuthwala abantu besuka lokuya emalokitshini aduzane.

Umqondisi weZupco, uMnu. Everisto Madanga, wenqabe ukuthatshwa ilizwi kodwa utshele iStudio 7 ecingweni ukuba akukafakwa ilanga isitimela esiyaqala ukuhamba koBulawayo kodwa uthembise ukuba kuseduze njalo bakhangelele ukuqala ngesiya eCowdray Park kanye lesiya Emganwini.

Lokhu kutsho ukuba abantu abahlala emalokitshini lawa bazasizakala ekuhambeni. UMadanga ukhuthaze uzulu ukuba amukele imizamo kahulumende eyokuletha indlela entsha yokuhamba njalo uthe inhlawulo eyokugada isitimela iyafana leyokugada ibhasi lamakombi kaZupco.

Facebook Forum

XS
SM
MD
LG