amalinks wokungena

Breaking News

Osomabhizimusi Bakwele Botswana Bathi Kabakaqalisi Ukuvula Amafekithali eZimbabwe


Mnu. Norman Moleele

Inhlanganiso yamabhizimusi yakwele Botswana, eye Business Botswana, ithi amalunga ayo azakuma kancane engakagijimeli ukusungula amabhizimusi eZimbabwe, efuna ukubona ukuthi amanzi agelezela kuphi, kulandela ukungena kuka Mongameli Emmerson Mnangagwa esikhundleni phambili kohambo lukaMnangagwa ngoMvulo.

Ekhuluma leStudio 7, usibalukhulu weBusiness Botswana, uMnu. Norman Moleele, uthi basalinde ukuthi babone ukuthi kulenguquko na ukusuka kumbuso ka Mnu. Robert Mugabe.

“Amalunga ethu azafuna ukwazi ukuthi angenelisa yini ukuphendukisa inzunzo eBotswana, kungelamigoqo eminengi.”

IBusiness Botswana ilamalunga adlula inkulungwane ezimbili (2,000), kugoqela amakampani akuluhlu lweStock Exchange, kanye laphethwe nguhulumende.

Amabhizimusi angaphansi kweBusiness Botswana alobudlwelwano laweZimbabwe njalo avame ukubikisa kumbukiso efana le Harare Agricultural Show, kanye lomaqhuzu wazo, iZimbabwe International Trade Fair (ZITF) yona eyenzakala mnyaka yonke ngoMabasa.

UmMnu. Moleele uthi noma nje sekube lontshintsho eZimbabwe, bazakuma kancane bengakakhuthazi amalunga abo ukuthi aqale ukuphendla amathuba amabhizimusi eZimbabwe. “Izinto yikho ziqale ukutshombuluka, phakathi kwamazwe womabili. Abebhizimusi kweleBotswana balinde ngamehlo abomvu ukuthi babone ukuthi umumo uyakuphi.”

UMoleele uthi useke wahlangana lequla logatsha olubona ngezokukhanga ezamabhizimusi eZimbabwe, iZimTrade, bakhulumisana ngokuphathelene ngezokuvula amabhizimusi.

Uthi kodwa bavumelene ukuthi kusemasinya, kumele balinde bebone ukuthi kuzahamba njani kusiyaphambili.

Iqula leZimTrade liseBotswana kusekela mhla ziku 5 Nhlolanja kusiyafika mhlaka 14, ukuzodingisisa ukuthi amabhizimusi eZimbabwe angathola amathuba kuziphi inhlangothi zebhizimusi kweleBotswana.

UMnu. Moleele uthi abamabhizimusi eBotswana bakhengelele inhlangothi ezithile eZimbabwe, lapho ababona kulamathuba khona.

“Kumele kuqale kube lokucwayisisa, siqale sikhulume lamalunga ethu sizwe ukuthi bangabe bethakazelela ukungena kuziphi izigaba.”

UMoleele ukhuluma ngesikhathi kulomhlangano owe Joint Permanent Commission on Cooperation (JPCC) phakathi kwe Botswana leZimbabwe osungule ngoLwesine eGaborone oqhubeka kuze kufike ngeSonto.

Kukhangelelwe ukuthi kulotshwe izivumelwano ezimbalwa ezokuthenga lokuthengiselana phakathi kwamazwe womabili ngaphansi komhlangano we JPCC.

Umhlangano we JPCC uphendla uhambo luka mongameli Mnangagwa yena ozafika eGaborone ngoLwesibili ukuzoqinisa ubudlelwano phakathi kwamazwe womabili.

Facebook Forum

XS
SM
MD
LG