Lanxa umtshutshisi omkhulu kahulumende, uProsecutor-General uMnu Kumbirai Hodzi esithi ihofisi yakhe ayisoze ivume ukuthi abasolwa abetheswa amacala okutshintsha imali yakwamanye amazwe ngaphendle komthetho labosomabhizimusi abathengisa ngentengo yomkambo wensitha bakhululwe ngemali yesibambiso, ibail, ingcwethi kwezemithetho zithi lokho akukho emandleni akhe.
UHodzi utshele iphephandaba leSundayMail izolo ukuthi bafuna labo abayabe bebotshelwe amacala la bathonisiswe bevalelwe ejele.
Ibhanga elikhulu lelizwe eleReserve Bank of Zimbabwe (RBZ) lithi liqhuba uphenyu phezu kwaloludaba ukuze kubotshwe zonke izephulamthetho, zona elithi yizo ezibulala umnotho welizwe.
Iziphathamandla zalelibhanga zizahlangana labosomabhizimusi kuliviki bekhulumisana ngaloludaba.
Igqwetha uMnu Dumisani Dube utshele istudio 7 ukuthi ukukhululwa kwabasolwa ngemail ye-bail lilungelo elisemthethweni elingeke lilawulwe nguHodzi.
Kusenjalo, unobhala jikelele wenhlanganiso yeZCTU uMnu Japhet Moyo ukhuthaze inhlanganiso ezimela izisebenzi ukuthi zifake abaqhatshi incindezi ukuze bakhweze iholo lezisebenzi kulandela ukukhuphuka kwentengo yezinto.