WASHINGTON DC —
Amagqwetha entathelizindaba uHopewell Chin’ono athi asesiya enkantolo yeHigh Court ukuyaphikisa ukuncitshwa kwakhe imvumo yokukhululwa ngemali yesibambiso, i-bail, lidale likamantshi izolo.
Umantshi uMerehwanazvo Gofa wale ukukhulula uChin’ono esithi ulomkhuba wokudala amacala nxa ephandle.
UChin’ono ubotshwe ngeviki edluleyo esetheswa icala lokuvimba isandla somthetho phezu kwamazwi awethula enkundleni yeTwitter ngelinye njalo icala ake walibotshelwa kunyanga ezedluleyo elokutshotshozela udlakela.
Isigodlo seMelika sona sethule umbiko sisole ukwalelwa kukaChin’ono ukukhululwa nge-bail sisithi le yinto emele isolwe nguzulu weZimbabwe jikelele ngoba kuyikwephula isisekelo sombuso welizwe.