Inhlanganiso yeZimbabwe Lawyers for Human Rights (ZLHR) ithi isikhweze isicelo eHigh Court esokuthi umeli weHarare West edale lephalamende njalo elilunga leMDC Alliance uNkosazana Joanna Mamombe akhululwe.
UMamombe uvalelwe ngumantshi okwamaviki amabili ejele leChikurubi ngoLwesine ukuze ahlolwe ngodokotela bakahulumende ukuthi ingqondo zakhe ziyasebenza kuhle na andubana icala lakhe lithoniswe.
Unkosazana Mamombe labanye bakhe ababili uNetsai Marova loCecilia Chimbiri betheswa icala lokuqamba amanga ukuthi bathunjwa.
I-ZLHR ithi udaba lolu kumele luhluzwe ngesiphangiphangi.
Ithi uMamombe kumele akhululwe njalo ahlolwe ngodokotela azikhethele bona hatshi laba abakahulumende abetheswe yinkantolo.
Isigodlo someli weMelika eZimbabwe sona sithi nxa uhulumende ewahlonipha amalungelo oluntu njengokutsho kukaMongameli Emmerson Mnangagwa emhlanganweni weUnited Nations ngoLwesine, icala eletheswa uMamombe kumele lesulwe njalo akhululwe.
Olwela amalungelo oluntu uMnu Mlungisi Dube utshele iStudio 7 ukuthi ukuvalelwa kukaMamombe kuveza sobala ukuhlukuluzwa kwabamabandla ephikisayo nguhulumende weZanu PF.
