Amagqwetha kaMnu. Job Sikhala, otholakele elecala lokuloba amanga enkundleni yokuxhumana eyeFacebook, asecele umthethwandaba ukuba uqala udinge ulwazi edale leHigh Court ngecala leli ngoba isiqa somthetho osetshenziswa ngabatshutshisi kawukho emithethweni yelizwe. Kodwa abatshutshisi bathi kumele ajeziswe ngakwenzayo.
Bekugcwele abantu emthethwandaba weRotten Row eHarare behlabela besekela uSikhala bethi kumele amacala akhe wonke awetheswayo alahlelwe khatshana.
Abatshutshisi bakahulumende bebeqonqosela ukuba umthethwandaba wethule isigwebo esilukhuni besithi indlela aloba ngayo enkundleni yeFacebook yangcolisa isithunzi selizwe.
Kodwa amagqwetha kaSikhala athi kwephulwa isisekelo sombuso welizwe okwenziwa ngabatshutshisi USikhala, obesehlale umnyaka lengxenye entilongweni, utholakale elecala lokuloba amanga esithi kulomntwana owabulawa ngamapholisa esemhlane kanina. Usanda kugwetshwa iminyaka emibili ebekwe eceleni kulandela ukutholakala kwakhe elecala lokutshotshozela udlakela.Umtshutshisi kudaba lolu uMnu. Anesu Chirenje utshele umthethwandaba ukuba uSikhala kumele agwetshwe okuqinileyo ukuze uzulu afunde ukungaqambi amanga esebenzisa inkundla zokuxhumana.
Igqwetha lakhe, uMnu Harrison Nkomo, ufunge wemba phansi esithi umthetho uSikhala atholakale elecala ngawo uphambana lesisekelo sombuso welizwe.
UNkomo unikeze inkantolo umzekeliso wesinqumo esethulwa lidale leHigh Court ngesikhathi likhulula intathelizindaba uHopewell Chin’ono. Idale lathi isigaba 31 (Section 31 (1) (a)) somthetho weCriminal Law Codification Reform Act asikho emthethweni.
UNkomo ukhuthaze ucele umantshi uFeresi Chakanyuka ukuthi athole amacebo eHigh Court engakagwebi uSikhala.
“Esikukhulume enkantolo yikuba lo ngumthetho ongekhoyo. Simelele ukuba batsho abafuna ukukutsho kodwa kusobala ukuba akula mthetho ozakwenza agwetshwe.’’
Igqwetha elibona ngamalungelo oluntu uMnu Kudakwashe Zulu uthi vele akukhanyi ukuthi uSikhala wephula mthetho bani.
“Kusobala ukuba umthetho abafuna ukuwusebenzise awukho kumabhuku ethu omthetho. Kumele akhululwe uSikhala ngoba akula akuphazamisayo.’’
Kodwa elinye iggqwetha uMnu Liberty Ncube uthi okwamanje uSikhala akala nyathelo angalithatha engakagwetshwa.
“USikhala kamelele ilanga lakhe aphiwe isigwebo. Nxa udaba lwakhe lusasekhona kumele aye edale le High Court esegwetshiwe hatshi khathesi.’’
USikhala uzaphenduka emthwethwandaba Ngolwesine mhlaka 15 Nhlolanja lapho umantshi akhangelelwe ukwethula isinqumo sakhe kudaba lolu.
Forum