amalinks wokungena

Breaking News

Amalunga eZanu PF Azatshengisela Emgwaqweni Ngesikhathi iMDC Alliance Isenza Okufanayo


Ibandla leZanu PF lithi abalandeli balo bazatshengisela emigwaqweni ngoLwesibili beveza ukuthakazelela uMongameli Emmerson Mnangagwa othi akumelanga kubelodlakela lonyaka ngesikhathi sokhetho lwe Zimbabwe.

Abatshengiselayo bazancediswa zinhlanganiso ezimele izifundi, abantwana balabo abalwa impi yenkululeko labanye abafisa ukwenza lokhu.

Ukutshengisela kwabo kuzakwenziwa ngelanga umanyano weMDC Alliance ungena emigwaqweni ukhononga ngokungalungiswa ngemfanelo ukhetho oluzayo.

UMnu. Nick Mangwana, umngcinisihlalo webandla leZanu PF eBhilithani, uthi ukutshengisela lokhu kwenzelwa ukuthi kukhuthazwe abantu ukuthi bangenzi udlakela ngesikhathi sokhetho.

“Lokhu kwenzelwa ukuthi abantu bakhuthuzwe ukuthi kungabi lodlakela mhlaka 30 ngoNtulikazi lapho esizakwenza khona ukhetho lwelizwe. Abantu bazabe bethwele amabhakani begqoke lezembatho zebandla besuka endaweni ethize besiya kweyinye. Kabasoze baye lapho okuzabe kulalabo abayabe betshengisela emigwaqweni ngesikhathi esifanayo.

“UMongameli welizwe usekhulume kakhulu ngokuthi kumele kuqhutshwe ukhetho olubalulekileyo lonyaka. Sifuna ukutshengisa ukuthi siyakusekela lokhu. Lokhu yikho okukhulunywa ngamalunga ebandla leZanu PF. Sonke sikhuluma ngakho ngoba lokhe wangena esikhundleni, umongameli ukhuluma ngokuthi uzulu kumele akhululeke ngokwenza akufisayo.”

Uthi kabasoze balwisane lalabo abazabe betshengisela emigwaqweni abomanyano weMDC Alliance.

“Lokhu kasikwenzeli ukuthi sivimbe labo abatshengiselayo ngesikhathi esifanayo. Ukukhululeka kutsho ukuthi ungenza okufunayo ngesikhathi kulabanye abenza okunye. Siyakukhuthaza lokhu ngoba abantu babona izinto ngendlela eyehlukeneyo.”

Umanyano weMDC uyasola kakhulu indlela okulungiselelwa ngayo ukhetho oluzayo.

Ingxoxo Esiyenze LoMnu. Nick Mangwana
please wait

No media source currently available

0:00 0:01:49 0:00

XS
SM
MD
LG