amalinks wokungena

Breaking News

Amalunga Edale Lephalamende Ahoza uMnangagwa Owethula Umbiko Oqakathekileyo


UMongameli Emmerson Mnangagwa engakavuli okusemthethweni idale lephalamende.

Amalunga edale lephalamende akumanyano weMovement for Democratic Change Alliance aphume edale leli ngoLwesibili ngesikhathi uMongameli Emmerson Mnangagwa esethula umbiko wakhe welizwe oqakathekilayyo oweState of the Nation Address (SONA).

Amalunga la angafisanga ukulalela uMnangagwa esethule umbiko lo, aphume wonke umongameli eseqalisa ukukhuluma edale lephalamende.

UMongameli Emmerson Mnangagwa ufika edale lephalamende ngoLwesibili.
UMongameli Emmerson Mnangagwa ufika edale lephalamende ngoLwesibili.

Ahlabele kwaze kwazwakala indawo yonke esithi uMnangagwa weba ukhetho olusanda kwenziwa kwele Zimbabwe. Amalunga la athe umkhokheli weMDC Alliance, uMnu. Nelson Chamisa, nguye owanqoba kukhetho olwenziwa lonyaka ngoNtulikazi.

UChamisa wazama ukuguqula impumela yokhetho lukamongameli emthethwandaba weConstitutional Court kodwa kwehlula.

Lokhe ezama uChamisa ngamandla wonke ukuthi kuguqulwe impumela yokhetho esithi uzagcotshwa nguzulu ukuba abengumongameli welizwe leZimbabwe.

Lokhu kumiswe ngamapholisa athe akumelanga abantu benze umhlangano ngesikhathi ilizwe libhekane lomkhuhlane wesihudo.

UMnu. Nelson Chamisa
UMnu. Nelson Chamisa

UNkosikazi Nomathemba Ndlovu owe MDC Alliance uthe lokhu bakwenzele ukutshengisela ukuthi kabamukeli ubukhokheli buka Mnangagwa.

“Lapha besizama ukutshengisela umphakathi ukuthi asimazi uMnangagwa ngoba wantshonstha ukhetho mhlaka 30 July. Iphalamende ayisiyo yeZANU PF, iphalamende ngeyelizwe lonke yikho ubona sivela endaweni ezitshiyeneyo. Ukubuya ephalamende asisoze siyekele ukubuya. Nxa sibuya ephalamende asilandanga ZANU PF silande ukuzosebenzela isizwe, siqhubekelise ilizwe phambili kodwa yenalo owazifakayo esingakwaziyo ukuthi wanqoba ngengaki nguye esithi kasimazi.”

Loba kunjalo, uMnangagwa wenelise ukwethula umbiko wakhe weSONA ephalamende lapho atshele amalunga ebandla lakhe ukuthi uhulumende wakhe usethole izigidi ezingamakhulu amahlanu zamadollar - $500 million - ekhangelelwe ukuqeda udubo lokuswelakala kwemali elizweni.

Uthe mali le izaphathisa amankampani afuna ukuthenga impahla yokusebenzisa phandle kwelizwe.

Okwenzakale phandle kwedale lephalamende ...
Okwenzakale phandle kwedale lephalamende ...

UMnangagwa uthi ibhanga elikhulu lesizwe ele Reserve Bank of Zimbabwe lenelise ukuvumelana lenhlanganiso ezikweledisa imali ezithile.

“Uhulumende wami esebenza le Reserve Bank of Zimbabwe usekhulumelane lenhlanganiso ezitshiyeneyo ezivume ukusinika imali engafika amamiliyoni angamakhulu amahlanu amadola akwele Melika ($500 million) ezaqeda udubo lwemali yaphandle elizweni oselukhathaze uzulu. Eyinye yaleyo mali izaqala ukuthelwa kumnotho welizwe kuyonale iviki”.

UMnangagwa uthembise uzulu ukuthi imali yama bond izaqhubeka isebenza okwakhathesi sizesifike isikhathi esiqondileyo sokuthi ilizwe libe lemali yalo.

Lokhu kungemva kokuba umpathintambo wezemali lomnotho welizwe, uMnu. Mthuli Ncube, ethe ilizwe sekumele libe lemali yalo.

UMnangagwa uphinde wathi iphalamende le kufanele isebenze gadalala ekuqedeni ubusela lenkohlakalo kuziphathamandla zikahulumende lezamankampani azimele wodwa osebubulele ilizwe.

Uthe uzaqondisa imithetho etshiyeneyo ekhangelane lokuthuthukisa indlela uhulumende wakhe azaziphatha ngayo kanye lokuvula amagagasi kumankampani afuna ukusakaza.

UMongameli Emmerson Mnangagwa ...
UMongameli Emmerson Mnangagwa ...

Lokhu kubuya ngesikhathi imithetho ebona ngokusakaza elizweni incindezela labo abafuna ukuvula amankampani okusakaza kanye lokusebenza kwentathelizindaba zikhululekile.

Uphinde wakhuthaza amankampani kahulumende afana labo National Railways of Zimbabwe, Cold Storage Company, Grain Marketing Board lamanye ukuthi asebenze ezimela hatshi ukuthemba usekelo lwemali kahulumende.

Isikhulumeli sebandla eliphikisayo ele MDC, uMnu. Jacob Mafume, uthe uhulumende weZANU PF akalawo amandla wokwenelisa ukuguqula inotho yelizwe njengoba kunguye owabulala umnotho welizwe.

Uphinde wathi lokhu okutshiwo nguMnangagwa yindlela yokuvala uzulu amehlo ngoba akutshoyo ayisikho akwenzayo.

“Kumbiko awukhulumileyo namhlanje uyazibonela ukuthi akuqondakali lokho akutshoyo. Bakhuluma ngokuthi bafuna ukuqeda ubusela kodwa siyazi ukuthi abaqinisanga kulokho …”

Udaba Esilethulelwe NguGibson Bhebhe
please wait

No media source currently available

0:00 0:04:23 0:00

Facebook Forum

XS
SM
MD
LG