amalinks wokungena

Breaking News

Uzakwetheswa Inkatha Na uNkosikazi Mugabe?


UNkosikazi Grace Mugabe

Uzulu uthi umhlangano weZanu PF ozaqhutshelwa eVictoria Falls ngoMpalakazi ulakho ukusombulula insindabephenduli yokuthi elakusasa likaNkosikazi Grace Mugabe limi njani kwezombusazwe.

Udaba olusegudwini ngolokulwisana kwecele elikhokhelwa nguMnu Emmerson Mnangagwa lelizibiza ngokuthi yiG40 elilamalunga agoqela uNkosikazi Mugabe, uMnu Jonathan Moyo labanye.

Amaxuku la abanga isikhundla sikaMongameli Mugabe, yena oseleminyaka yokuzalwa engamatshumi ayisitshiyagalolunye lanye (91) nxa athe wasuka esihlalweni.

Ukwenza kukaNkosikazi Mugabe kusukela nyakenye lapho adlale khona indima enkulu ekuxotshweni kukaNkosikazi Joyce Mujuru kuZanu PF lakuhulumende kutshiye abanye becabangela ukuthi uyasihahabela isihlalo sikaMongameli.

Ofundele izifundo zombusazwe uMnu Bongani Zoza, uthi ingongo kaNkosikazi Mugabe kwezombusazwe izacaca sobala kuConference yeZanu PF.

“Uma bengamkhetha ukuba ngumsekeli kaMongameli welizwe, kuyabe sokuzikhanyela sobala ukuthi uzalandela uMugabe ukuba nguMongameli welizwe,” kuchaze uMnu Zoza.

Isakhamuzi sakoBulawayo uGogo MaNkiwane uthi lanxa kungakacaci ukuthi ngubani ozakwetheswa inkatha ngemva kukaMugabe, uNkosikazi Mugabe ulakho ukuthatha isikhundla somkakhe.

Owayelilunga leZipra uMnu Ben Ngomane uthi ukwenza kukaNkosikazi Mugabe kutshengisa ukuba akavumeli imbono ehlukene leyakhe, ngakho akasilungelanga isikhundla sokukhokhela ilizwe.

UNkosikazi Mugabe kayanga empini yenkululeko, okungumgoqo umkhokheli weMDC-T uMnu Morgan Tsvangirai awufakelwa yiziphathamandla zohlangothi lwezomvikela kanye labasekeli beZanu PF abaphatheka kuleyompi.

Loba kunjalo uMnu Zoza uthi lokhu akusoze kube yingxaki kuNkosikazi Mugabe nxa elosekelo lweziphathamandla zebandla.

Umhlangano weZanu PF National People’s Conference ukhangelelwe ukuqala mhla ziyisikhombisa ngenyanga ezayo uyephela mhla zilitshumi lantathu njalo uzavulwa nguMugabe mhla zilitshumi lanye.

Abanye abacubungula ezombusazwe bathi lumhlangano ulakho ukuphela uNkosikazi Mugabe esekhutshulwe waba ngumsekeli kaMongameli, okuyisehlakalo esizambeka esimeni esihle sokubusa ilizwe umkakhe engasuka esikhundleni.

Udaba olukhangela ngempilo kaNkosikazi Grace Mugabe ihlandla lesihlanu
please wait

No media source currently available

0:00 0:03:54 0:00
Lapho esitholakala khona
XS
SM
MD
LG