Sokusele inyanga ezimbalwa ukuthi kwenziwe ukhetho kwele Zimbabwe kodwa imithetho ephathelane lezokhetho lokhu ingakalungisiswa.
Okumqoka okukhanya kuphazamisa amabandla ezombusazwe yikungaphiwa amathuba alingeneyo emisakazweni lakumaphephandaba kahulumende.
Kodwa kunsukwana ezisanda kwedlula amaphephandaba kahulumende abesesipha amathuba amabandla aphikisayo lanxa amabandla la elokhu ekhala ngokuthi kukhitshwa indaba eziwagconayo kuphela hatshi ezithengisa inhlelo lemilayezelo yawo.
Lokhu kwenzakala kulandela ukufika elizweni kwabazohlola ukhetho.
Ukuhlaziya loludaba sixoxe lomsekeli wesikhulumeli sebandla lePeople’s Democratic Party, uMnu. Edwin Ndlovu, endawonye lelunga ledale lephalamende, engowebandla leMDC-T, uMnu. Prince Dubeko Sibanda.
UDubeko Sibanda uthe, “UMnangagwa lapho ayabe eyekhona imota zeZTV ziyalandelana zibe ludwendwe bayezikhipha indaba zakhona live. Kithi thina esikumabandla aphikisayo kasikanikwa ithuba lokusakaza ‘live’,” kutsho uSibanda.
Wengezelele esithi lalapho okuya khona uNkosikazi Auxillia kaMnangagwa umsakazo weZBC uyabe ukhona.
UNdlovu uthi: “Isintu sithi umntwana wenyoka yinkoka, uMnangagwa ngumntaka Mugabe. In terms of media reforms akula osekwenziwe, kulokhu kufana lalaphayana kusabusa uMugabe.”