Akubizwa ozwayo emapulazini abalisa eleTimber farm, eTshindeni, koFakazi kanye leDip 4 esiqintini seGwanda lapho abantu abavela endaweni ezitshiyeneyo zelizwe bethe gwaqa ukuzogola amacimbi ukuze baziphilise.
Lababantu bahlezi ematendeni lemishasheni egangeni njalo bathi basukunyiswe ludubo lwendlala olusemakhaya.
UNkosikazi Gladys Ncube oleminyaka yokuzalwa engamatshumi ayisificaminwemibili lanhlanu-85 usuke emzini wakhe eSengenzane esiza emkhosini wamacimbi eTimber Farm.
Uthi udubo lokunakekela abazukulu ngemva kokubhujelwa ngabantwabakhe ludale ukuthi asukumele phezulu esizwa ukuthi sekulamacimbi.
Esinye isakhamuzi esivela eSengenzane uNkosikazi Magadalene Dube oleminyaka yokuzalwa engamatshumi ayisithupha lasificaminwemibili 68 ukhala ngokuthathelwa amacimbi ngabanikazi bamapulazi lapho bebathola bewagola.
Epulazini leDip 4 sixhumane loMnu Vincent Moyo laye oleminyaka yokuzalwa engamatshumi ayisithupha lasificaminwemibili.
UMoyo uthi useleminyaka emithathu egola amacimbi kuleli ipulazi, njalo uthi lonyaka awazange abemanengi ngenxa yokungani kuhle kwezulu.
Ngaphandle kwezalukazi labokhulu abanye abakade begola amacimbi bagoqela izisebenzi zikahulumende ezibalisa amapholisa lababalisi.
Ibhakede elilodwa lamacimbi belithengiswa ngamaRands angamakhulu amahlanu R500 khonale egangeni.
Abanye abagola la amacimbi, ngendlela yokuziphilisa, bavela eBeitbridge, eZvishavane kanye laseMberengwa.
Ukuvulwa kwezikolo sekutshiye inengi labazali lisehluleka ukubhadalela abafundi indleko zesikolo.
UNkosikazi Santa Mabuya oweSitezi uthi njengabazali babhekane lodubo lokubhadala indleko zesikolo.
Ngaphandle kwendingeko zesikolo abafundi babhekane lendlala elakho ukudala ukuthi bengayi esikolo kuthi amantombazana wona abhekane lodubo oluphindwe kabili kutsho UNkosazana Pamela Ncube oweSitezi.
UMqondisi wenhlanganiso yabomama bemaphandleni eyeWomen’s Development Association of Zimbabwe iWODAZ uNkosikazi Juliet Nkiwane uthi kulobunzima obukhulu emaphandleni.
Inhlanganiso ye World Food Program ithi abantu abedlula izigidi eziyisikhombisa babhekane lendlala embi kuleli njalo bafuna ukuncediswa ngokudla kulandela ukungani kuhle kwezulu kuminyaka eyedlulileyo.
