Amapholisa athi abophe abasolwa ababili ababalisa isotsha kanye lomunye owaxotshwa esipholiseni, phezu kwesehlakalo sokukhuthuzwa kwenye imuli eHarare ngoMvulo.
Igama lesotsha nguVirimai Nyandoro njalo owayelipholisa lo nguFrancis Takura.
Isikhulumeli samapholisa uMnu Paul Nyathi uthi ababili laba bayingxenye yezigebengu ezinhlanu ezingenele imuli yowake waba lipholisa njalo oseligqwetha uMnu Joseph Nemaisa behlomile besithi bafuna imali.
UNemaisa, owayengekho endlini ngalesosikhathi, waphanga watheleka esetshayelwe ucingo yindodana yakhe wabuya walwisana lezigangi lezi ngombhobho wabulala ezintathu ezibalisa uBrian Koga Tendere, uCharles Chirara loTariro Gora.
UNemaisa unconywe ngabanengi besithi uvikele umndeni wakhe. Ababili babafi babikwa labo babengamasotsha njalo ababili laba ababotshwe izolo babaleka ngesikhathi uNemaisa edubula abanye babo.
Isiphathamandla senhlanganiso yeIbhetshu likaZulu uMnu Mbuso Fuzwayo utshele iStudio 7 ukuthi ukuphatheka kwamasotsha lamapholisa emisebenzini yobugebengu kuveza sobala ukuthi umumo awukho muhle elizweni.
