Amapholisa lamasotsha eZimbabwe bathi abantu ababetshengisela emigwaqweni bakhahlanyezwa njalo babulawa yizigebengu ezazigqoke izembatho zabo ezatshontshwa amadolobheni.
Umbiko lo wethulwe ngamapholisa lamasotsha ngoMgqibelo eHarare bekhuluma lentathelizindaba kulandela ukutshengisela kukazulu emadolobheni atshiyeneyo ekhonona ngokugugudeka komnotho welizwe okwenze kwakhuphuka intengo yempahla lamafutha ezimota.
USenior Assistant Commissioner Charity Charamba, isikhulumeli samapholisa, uthe izidlova ebezisebenzisa izembatho zamapholisa lebutho bezithwalise nzima uzulu.
“Ezinye izembatho lezi zatshontshwa eChegutu leEpworth. Sike sabopha ezinye izigebengu ezinhlanu ebezihlomile ebezisebenzisa izambatho lezi mhlaka 14 Zibandlela. Kade belezimota abazithethe endaweni eziboleka izimota.
“Kulandela lokhu sinika abantu bonke isikhatshana nje ukuthi balethe izembatho lezi. Lokhu kugoqela abatshiya ibutho okusemthethweni lababaleka esipholiseni lakubutho. Abalethe izembatho lezi kithi abeZimbabwe Defence Forces.”
Isikhulumeli sebutho uOverson Magwisi ugcizelele esithi labo abangasoze balethe izembatho lezi bazajeziswa libutho lamapholisa.
“Bonke abalezembatho lezi siyazicela ngokutshetsha ngoba sizababamba sibajezise. Labo abazi abantu abalezembatho lezi sicela betshele ibutho kumbe amapholisa.”
Kodwa-ke ababone ngelungelo likazulu bathi kuyayangisa okwethulwe libutho lamapholisa okukhanya bezama ukuvalavala abakwenze ebantwini.
Bathi okumangalisayo yikuthi abavezelanga uzulu inani labantu abafayo lababotshwa ngesikhathi abantu betshengisela emigwaqweni emadolobheni njalo lalabo ababotshwe kusukela ngoLwesibili kuze kuyefika uMgqibelo.
Bathi kukhanya engani kulabantu abanengi abafayo labedlula amakhulu ayisithupha – 600 - ababotshwe emadolobheni.
Bekuvalwe ubulembu bokuxhumana ngesikhathi uzulu ethwaliswe nzima ngamasotsha lamapholisa kusukela ngoMvulo.