Amapholisa avimbe izisebenzi zikahulumende ukuthi ziqhube uhlelo lwazo lokutshengisela eHarare NgoLwesithathu luqoqwe ngeviki edluleyo njalo zaphiwa imvumo yokwena lokho.
Izisebenzi zikahulumende zithole indawo lapho ebeziqoqe ukubuthana khona ziqalisela khona ukufola zitshengisela, igonjoleelwe ngamapholisa akade ehlome kanzima langemota ezikhafula amanzi aphandlayo.
Loba kunjalo kulezinye izisebenzi zikahulumende ezenelise ukufika emawofisini awe Public Service Association baqalisa ukufola behlabela beqonde emawofisini kampathintambo wezemali, uMnu. Mthuli Ncube lawompathintambo wezisebenzi uNkosikazi Sekai Nzenza ukuyatshiya ugwalo lwezikhalazo zazo.
Bathe besuka emawofisi awePSA betwhele amabhakane abelotshwe okutshiyeneyo okusola umqatshi amapholisa ahle asebenzisa udlame ukuthi bengedluli umduli obubunjwe yilamapholisa. Ozame ukwedlula kulumduli ube tshaywa kakubi ngamapholisa inengi labakade betshengisela laze lazihlalela phansi kodwa amapholisa abalanda ebadonsela khatshana.
Umgcinisihlalo wenhlanganiso yezisebenzi zikahulumende eyeApex Council, uNkosikazi Cecelia Alexander, leyinye inkokheli bake bazama ukukhulumisana lamapholisa kodwa ala khona ukunyikinyeka esithi akuyindawo lokhu kutshengisela.
Abenhlanganiso yababalisi bemaphandleni eyeAmalagamated Rural Teachers Union of Zimbabwe, ARTUZ, bathi okuhluphayo yikuthi uhulumende kamongameli Emmerson Mnangagwa usecabanga ukuthi uhlamukelwa yizisebenzi zakhe khona indaba egudwini kuyikuthi abantu bafuna ukwengezelelwa iholo elingenelisa ukuthi baziphilise lemuli zabo.
Abeyinye inhlanganiso yababalisi eyeProgressive Teachers Union of Zimbabwe, PTUZ, bakhala ngokuthi izisebenzi zikahulumende zithwele nzima phansi komumo wezomnotho oselizweni okwamanje, okuyikho okubangela ukuthi batshengisele ngale indlela.
Abe Apex Council bathi bazakhweza udaba lwabo lokwaliswa ukutshengisela ngamapholisa enhlanganisweni yomanyano wezisebenzi emhlabeni jikelele eyeInternational Labour Organization.
Asenelisanga ukuzwa umbono wamapholisa ngalolu daba njengoba isikhulumeli sawo uMnu. Paul Nyathi, ubengadobhi umakhalekhukhwini wakhe Kanye lompathintambo wezisebenzi uNkosikazi Nzenza laye ubengadobhi umakhalekhukhwini wakhe.
Umpathintambo wezemali esike samthinta ngocingo uthe okwamanje usaphathekile angeke akhuluma ngodaba lweholo lezisebenzi zikahulumende kodwake utshele amalunga edale lephalamende emhlanganweni owenzelwe eVictoria Falls ukuthi uhulumende akala mali efunwa yizisebenzi yokuthi iholo lazo lilingane lesisindo sedollar leMelika ngesilinganiso esisemabhanga.
Izisebenzi zikhala njalo ngokuthi uhulumende akaphumeli egcekeni ngempumela yenkulumo lohlangothi olweNational Joint Negotiating Council phezu kwesilinganiso sokwengezelelwa iholo Kanye lamabonus. Izisebenzi zithi iholo ezilitholayo okwamanje aleneli khona ukuya emsebenzini kungakakhulunywa ngezinye indleko zemuli.