amalinks wokungena

Breaking News

Amasotsha Etheswa Icala Lokufumbathiswa Ngabotsheketsha eWest Nicholson


Umtshina Osetsehnziswa Ngabotsheketsha

Amasotsha eWest Nicholson abikwa ehlukuluza otsheketsha efuna ukufumbathiswa ukuze baqhubekele phambili ngomsebenzi wabo osekubangele ukuthi abanengi bengasayi gebha igolide.

Kuviki eyedlulileyo endaweni yeWest Nicholson lapho okugcwela khona izimbamgodi kubikwa amalunga ebutho amabili akade esuka vimba umgwaqo kuroadblock engenele otsheketsha entabeni lapho abagebha khona igolide.

Sixhumane lomunye wabo tsheketsha laba ongathandanga ukwazakala ngoba esesabela impilo yakhe.

Sokulembiko ethi amabutho asephatheka kundaba zokuhlukuluza abantu lanxa isikhulumeli sabo sisithi imfanekiso ethunyezelwana nguzulu emafonini eminye yakhona ngeyakudala. Kodwa inhlanganiso ethula izehlakalo zokuhlukuluzwa, eye Zimbabwe Peace Project ithi amanye amasotsha asevuke ubhova.

Ingcwethi ecubungula ezombusazwe uMnu. Mlamuli Nkomo uthi kuzahlala kulembiko yokuhlukuluzwa kukazulu libutho nxa liqhubekela phambili lisephakathini.

Inengi esabelweni seZansi yemaNdebeleni ikakhulu abasakhulayo baziphilisa ngokwemba igolide ngenxa yokusilela kwemisebenzi.

Kulembiko njalo eveza ukuthi ibutho lihamba lisethusela uzulu ongabhalisanga ukuvota lisithi lowo ozatholakala engela bufakazi bokubhalisa ukuvota uzawukhomba umuzi olotshwala.

Abanye bathi ibutho lalo selifunda amaqhinga amapholisa okwenza imali emgwaqweni ngobugwelegwele njalo sekuzafana lalapho amapholisa esavimba wodwa imigwaqo ngesikhathi sombuso kaMugabe.

UMongameli Emmerson Mnangagwa uthi uzimisele ukulwisana lobugwelegwele elizweni njalo labo abazatholakala belecala bazaphelelwa yimisebenzi.

Imizamo yokuxoxa leziphathamandla zebutho ngaloludaba iyehlule kodwa ibutho selikhiphe inombolo lapho uzulu okumele atshayele khona lapho ethe wahlukumezwa ngabebutho.

Limbiko yokuhlukumezwa kwabo tsheketsha iza ngesikhathi sokulokukhonona ngokuziphatha kwamanye amalunga ebutho okubikwa ehamba ehlukumeza uzulu.

Ibutho liconywe kakhulu nguzulu ngesikhathi kugenqulwa umbuso kaRobert Mugabe kunyanga edluleyo, kodwa imbiko ethi ibutho selihlukumeza uzulu selidale ukuthi inengi lithi nga ibutho liyabuyela enkambeni lisuke ezitaladeni.

please wait

No media source currently available

0:00 0:03:17 0:00


Facebook Forum

XS
SM
MD
LG