amalinks wokungena

Breaking News

Amazwe Atshiyeneyo Akhalela Imuli kaTsvangirai


Isigodlo seBhilithani leseMelika eZimbabwe sezithumele amazwi enduduzo emulini kamuyi uMnu Morgan Tsvangirai lakuzulu jikelele zisithi zikhala ndawonye labantu beZimbabwe.

Isigodlo seMelika sichaze uTsvangirai njengomuntu osebenze gadalala emkhankasweni wokuletha umbuso okhululekileyo kanye lokuthula elizweni.

Umeli waseBhilithani eHarare uNkosikazi Catriona Ling yena uthe ukutshona kukaTsvangirai kutshiye ilizwe leZimbabwe lembeswe yilifu elimnyama tshu.

UMongameli waseKenya uMnu Uhuru Kenyatta, emazwini awethule enkundleni yeTwitter, uthe ilizwe lakhe lalo likhala kanye lemuli yeZimbabwe.

“Sikhulekela ukuthi uNkulunkulu eduduze njalo ephe amandla imuli kaDr Morgan Richard Tsvangirai kanye labangane bakhe,” kutsho uKenyatta.

Amazwi kaKenyatta agzizelelwe nguhulumende waseBotswana emazwini awethule enkundleni efanayo.

UTsvangirai ufele esibhedlela kweleSouth Africa ngoLwesithathu lapho ekade eselatshwa khona umkhuhlane wemvukuzane ohlasela ithumbu elikhulu, icolon cancer.

Ubeseleminyaka yokuzalwa engamatshumi ayisithupha lanhlanu, 65.

Facebook Forum

XS
SM
MD
LG