amalinks wokungena

Breaking News

Kuqhubekela Phambili Ukuthoniswa Kwamacala Etheswa uDonald Trump


Kuthoniswa amacala etheswa owayengumongameli uDonald Trump

Kuqhubekela phambili ukuthoniswa kowayengumongameli wakwele Melika, uMnu. Donald Trump, edale leSenate kulandela okwethulwe ngamalunga edale leli izolo athe kumele athoniswa amacala ambalwa agoqela ukutshotshozela udlakela lokuzama ukuhluthuna amavoti okhetho olwenziwa nyakenye loba sewaphuma esikhundleni.

Abakhokhela ukuthoniswa kuka Trump ababizwa ngokuthi ngama impeachment managers, abagoqela uSenator Jamie Raskin, bakhanya betshaye kwazwela izolo lapho abachaye kwabonakala ukuba kumele kuqhubekele ukuthoniswa kwamacala etheswa uTrump.

Kodwa-ke uMnu. Bruce Castor Jr, omunye wamagqwetha kaTrump, uchothozwe kakhulu ngamalunga ebandla lama Republicans kanye loTrump abathi kade engalungiselanga ngemfanelo ukuhlaziya ukuba uTrump engetheswa amacala lidale leli engasekho esikhundleni sikamongameli. Lokhu kwenze ukuba elinye ilunga leSenate elimele ibandla lama Republicans liguqule imicabango yalo livote labanye abakubandla leli abane ukuba uTrump athoniswe loba sewaphuma esikhundleni sikamongameli.

Amalunga edale leSenate angamatshumi amahlanu lasithupha – 56 bavotele ukuba uTrump athoniswe amacala abhekane lawo.

Odabuka eZimbabwe ohlala kwele Melika, uMnu. Washington Jamela, uthi kuqondile okwenziwe ngamalunga edale leSenate.

UJamela uthi akumangalisi okunye okwenziwa ngabalandeli bebandla lama Republicans.

Lokhu kusekelwa nguMnu. Raphael Mthombeni, odabuka eZimbabwe ohlala eDallas Texas kwele Melika.

Ukuthoniswa kwamacala etheswa uTrump kukhangelelwe ukuthi kuzaqhubekela phambili namuhla abaphethe udaba lolu besethula obufakazi bokuthi uTrump watshotshozela abalandeli bakhe mhlaka 6 Zibandlela lonyaka ukuba bangene ngenkani eCongress bevimbe ukubalwa kwama electoral votes. UMnu. Joseph Biden wanqoba uTrump kukhetho olwenziwa ngoLwezi nyakenye kodwa uTrump wathi lwebiwa libandla lama Democrats. Akulabufakazi obuveza lokhu.

Sebethonisa Amacala Etheswa uDonald Trump
please wait

No media source currently available

0:00 0:04:03 0:00


Facebook Forum

XS
SM
MD
LG