Abatshutshusi abathonise amacala etheswe owayengumongameli uMnu. Donald Trump kanye labanengi kubandla lama Republicans bayavumelana ukuba uTrump watshotshozela abalandeli bakhe ukuba bangene ngenkani eCongress bavimbe ukubalwa kwama electoral votes.
Bavumelana ngalokhu loba idale leSenate lithethe isinqumo izolo sokuthi uTrump kalacala. Kulabantu abafika phose amatshumi ayisithupha – 57 abavotele ukuba uTrump ulecala lokutshotshozela udlakela eCongress kwathi abangamatshumi amane lantathu – 43 bathe kalacala.
Amalunga edale leSenate akubandla lama Republicans athe akukho emthethweni ukuthoniswa kuka Trump njengoba sewasuka esikhundleni sikamongameli. Omunye wabatshutshisi, uMnu. Jamie Raskin uthe bakuveze sobala okwenziwa nguTrump mhlaka 6 Zibandlela okwenza kube lodlakela eCongress.
Okhokhela ibandla lama Republicans edale leSenate, uMnu. Mitch McConnell, ovote ukuba uTrump kalacala, wethule umbiko kusanda kuvotwa echothoza okwenziwa nguTrump.
Olandela ezombusazwe, uMnu. Busani Mbuso Ntini, uthi akumangalisi ukuvota okwenziwe edale leSenate.
UNtini uthi okwamanje uTrump ubhekane lamacala amanengi alakho ukumfaka enginkeni.
UTrump watshela abalandeli bakhe ukuba ukhetho olwenziwa nyakenye lwebiwa ngabakubandla lama Democrats. Akulabufakazi obuveza lokhu. UMongameli Joe Biden wanqoba uTrump kukhetho lolu.
