amalinks wokungena

Breaking News

UTrump Ulungiselela Ukuvuma Ukuthi Ancintise Kukhetho Lukamongameli


UMongameli Donald Trump.(AP Photo/Alex Brandon)

UMongameli Donald Trump ukhangelelwe ukuthi namuhla uzakwamukela isicelo sebandla lama Republicans ukuba amele ibandla leli kukhetho oluzakwenziwa ngoLwezi lonyaka.

Uqhubekela phambili umhlangano webandla lama Republicans kulabantu abasekela uTrump ukuthi akhethwe njalo ukuba ngumongameli. Omunye wabakhuthaza lokhu likhosikazi lakhe, uNkosikazi Melania Trump, othi umkakhe uthanda abantu.

Abanye abantu bachothoza uTrump besithi kuyamehlula ukulwisana lomkhuhlane weCOVID-19. Sokulabantu abafika phose izigidi eziyisithupha abahlolwe batholakala belomkhuhlane lo kwele Melika. Loba kunjalo, umsekeli wakhe, uMnu. Mike Pence, uthi kuyamjabulisa ukuthi uzangena kukhetho lolu encedisa uTrump.

Abanye abakhulume emhlanganweni weRepublican National Convention bagoqela abantwana baka Trump, ababekubutho, ababengamapholisa labanye. Kodwa-ke ibandla lama Democrats eselikhethe uMnu. Joe Biden ukuthi ancintise kukhetho lukamongameli lithi uTrump kenzi kahle ngakho-ke kumele abantu bengamvoteli.

Abakubandla lama Democrats bakhala ngokuthi sokulobandlululo olumangalisayo embusweni kaTrump. UNkosazana Nokuthula Adonisi ngomunye okubonayo lokhu. Uthi akucaci ukuthi kungaphumani kukhetho lolu loba inengi labantu lithakazelela uBiden.

Kukhangelelwe ukuthi uTrump uzakwethula umbiko wakhe echothoza uBiden lebandla lama Democrats.

Facebook Forum

XS
SM
MD
LG