amalinks wokungena

Breaking News

Ilizwe leMelika Lithi EleZimbabwe Kumele Lilungise Imithetho Engahambelani Lesisekelo Sombuso Welizwe


UMnu. Antony Blinken

UMnu. Antony Blinken, okuhlangothi lukahulumende wakwele Melika olubona ngokudlelana lamanye amazwe, uthi eleZimbabwe kumele lilungise imithetho eminengi ukuze ihambelane lesisekelo sombuso welizwe njalo uMongameli Emmerson Mnangagwa akhulumisane lenkokheli yamabandla wonke ukwenzela ukulungisa okunengi okuhlaphayo eZimbabwe.

UBlinken, owethula umbiko lo ebulenjini beInternet kukhasi leU.S. Department of State, uthi inguquko engenziwa emithethweni etshiyeneyo lokukhulumisana kunganceda abantu bonke elizweni.

“Ngesikhathi ilizwe linanza uzibusi sinanzelela ukuthi banengi abalwela amalungelo abo njalo lenkululeko belandela okumumethwe yisisekelo sombuso welizwe. Sikhuthaza uhulumende wakwele Zimbabwe ukuba akusekela konke lokhu njalo akhulumisane labantu abanengi ngokwenzakala elizweni ukwenzela ukuthi kunanzwe amalungelo kazulu.”

UBlinken uthi abantu kwele Zimbabwe bafisa ukuhlala ngokuthula, ukuba lohulumende obalulekileyo lokunye.

“Ngalokhu, sizancedisa ilizwe leZimbabwe ukuba kube leziqondiso zokubusa eziqinileyo, kulungiswe ezomnotho lezempilakahle njalo kube lokudla okwanela abantu elizweni lonke.”

Ilizwe leMelika lafakela abalandeli bebandla leZanu PF lamankampani abadlelana lawo izijeziso zenotho lisithi bephula amalungelo kazulu.

Uhulumende kaMnangagwa uthi izijeziso lezi zafakwa ngenxa yokuthi eleZimbabwe lathathela abamhlophe amapulazi lawanika abansundu.

Facebook Forum

XS
SM
MD
LG