Lanxa udlakela lukaNkosikazi Grace Mugabe luqhubeka lusegudwini, abemisakazo lamaphephandaba kahulumende lokhe bengalulokothi loludaba.
UNkosikazi Mugabe ubhaxabule omunye untombazana amthole elamadodana akhe, uRobert Mugabe Jr. loBellamine Chatunga kwenye ihotela eSouth Africa ngeviki edluleyo.
Untombazana lo, ogama lakhe nguGabriella Engels, usele elenkalakatha yenxeba ebunzini lasekhanda.
Amagqwetha akhe ebefuna uNkosikazi Mugabe ebotshwe njalo ethonisiswe ngecala lodlakela.
Kodwa akusenzakalanga lokhu ngoba uhulumende weSouth Africa esuke wapha amvikela uNkosikazi Mugabe phansi komthetho weDiplomatic Immunity, okuyinto esolwe ngabanengi.
Konke lokhu kuphume emisakazweni lasemaphephandabeni akweleSouth Africa lakweleZimbabwe azimeleyo.
Kodwa amaphephandaba kahulumende weZimbabwe enze angani akulalutho olwenzakeleyo.
Ingcwethi kwezokwethulwa kwemibiko zithi imbangela esobala yikuthi ayamesaba uNkosikazi Mugabe, ikakhulu ngemva kokuyangisa isikhulumeli sikaMongameli uMnu George Charamba ngenyanga edluleyo esithi ubhala into ezingelangqondo kuphephandaba leHerald.
Omunye wabalombono lo ngumhleli wephephandaba elizimeleyo eleThe Standard uMnu Kholwani Nyathi.
