Omkabo bezisebenzi zemgodini owemba igolide owe Arcturas Mine owenkampani ye Metallon Gold Zimbabwe balokhu belala phandle kwamahofisi alinkampani edolobheni le Shamva befuna iholo labomkabo abangabhadalwanga kusukela ngomnyaka ophelileyo.
Sebelamaviki amabili omama laba lokhu belala kulinkampani. Omunye wabomama utshele iStudio Seven ukuthi kabasoze basuke baze baphiwe imali lezo, ngoba abantwana kabasayi esikolo lezindlini umangoye selala eziko.
"Vele kasisoze sisuke emahofisini la omkethu baze bathole iholo labo," kutsho lumama ongafunanga ukubethwa ngegama.
Lokhu kwenzakala kulokungamanga kahle kwezemigodi lokumiswa kokwemba ilitshe eliligugu elamadayimani nguhulumende.
Isiphathamandla senkampani yeMetallon, uMnu. Zenzo Nsimbi uthi okwenza umsebenzi ungahambi kahle kulindawo yikuthi yikwehla kwesilinganiso sentengo yezenjiwayo zonke nje emkambo yomhlaba jikelele.
"Kwaba lesivumelwano esenziwa ngo July ukuthi imine izabadala iholo labo inyanga zonke singaze sakhangela eyangemuva ukwenzela ukuthi abantu bathole ukuphila," kutsho uNsimbi.
Kodwa uNsimbi uthi njengoba izisebenzi lezi bezithola iholo lazo lonke kuze kufika inyanga edluleyo lapho okube lodubo lwemali ngoba inkampani ingasatholi nzuzo ngokuwa kwentengo yezenjiwayo emhlabeni jikelele okubalisa igolide.
