Kubhubhe oyedwa ngeCovid-19 eZimbabwe ngeSonto njalo kwatholakala abane belomkhuhlane lo.
Asebebhubhile selokhe lumkhuhlane ufike kuleli nyakenye sebeyinkulungwane elamakhulu edlula amahlanu, 1,520, kuthi asebetholakele belawo sebezinkulungwane ezingamatshumi phose amane, 36,822.
Ugatsha olubona ngezempilakahle luthi abahlatshwe ijekiseni yakuqala yokwenqabela iCoronavirus izolo bazinkulungwane ezintathu ezilamatshumi amane lanhlanu, 3,045.
Abahlatshwe eyesibili bazinkulungwane ezimbili ezilamakhulu phose ayisikhombisa, 2,663.
Inani lasebehlatshwe ijekiseni yakuqala kuphela selokhe loluhlelo lusungulwe ngenyanga edluleyo selifike kunkulungwane phose eziyisikhombisa, 68,511.
Asebehlatshwe ijekiseni yesibili njalo ingeyokucina sebezinkulungwane ezilitshuli ezilamakhulu ayisithupha lamatshumi amabili lasitshiyangalombili, 10,628.
Uhulumende uthi liya likhuphuka inani labazinikela ukuhlatshwa. Uthi njalo uMongameli Emmerson Mnangagwa namuhla uzakwamukela amajekiseni aphiwe eleZimbabwe ngeleIndia.
Phakathi kwamajekiseni azinkulungwane ezingamatshumi ayisikhombisa lanhlanu, 75,000, namuhla kuzafika amajekiseni azinkulungwane ezingamatshumi amathathu lanhlanu, 35,000.
Okwamanje iZimbabwe isebenzisa amajekiseni avele kweleChina abalisa eyeSinopharm leyeSinovac. EyakweleIndia yaziwa ngokuthi yiCovaxin.
Kusenjalo, abanye asebehlatshiwe eVictoria Falls babikwa sebewutshaya indiva lumkhuhlane bengasalandeli iziqondiso zokuwuvikela.
Isiphathamandla senhlanganiso yeVictoria Falls Residents Association uMnu Kelvin Moyo ukusolile lokhu esithi ngokwenzanje, abantu bazifaka engozini enkulu.
