Ihofisi yommeli weZimbabwe kweleBotswana ithi kayisaqhubeki inika imvumo abamabhasi ahamba phakhathi kwamazwe womabili, ngoba bephathisa abantu ukwephula iziqondiso zeCovid-19 kanye lokweqa imngcele okungekho emthethweni.
Encwadini elotshwe ngummeli weZimbabwe kweleBotswana, umnunzana Henry Mukonoweshuro uthi bakhathazekile ngomkhuba owenziwa ngabamabhasi ahamba phakathi kwamazwe womabili.
UMukonoweshuro uthi abamabhasi yibo abaphathisa izihambi ukweqa umngcele okungekho emthethweni kanye lokuthi bephule iziqondiso zeCovid-19.
Lokhu kugoqela ukuphathisa abagadi ukuthi bedlule emngceleni bengela ncwadi zempumela yokuhlolwa ukuthi abala Covid-19.
Ngokunjalo ihofisi yeZimbabwe ithi kayisasoke inikeze imvumo abamabhasi ahamba phakathi kweZimbabwe leBotswana.
Lokhu kuza ngesikhathi kuke kwaphuma umfanekiso owevidiyo utshingisa abantu besehla ebhasini bekhanya bengena iganga besiyakweqa umngcele.
Inengi labeZimbabwe abasebenzisa amabhasi, abafana lonkosikazi Emily Dube bathi lokhu kuzabalimaza kakhulu, ngoba bethembe wona lokuphathisa imphahla ekhaya.
“Siyezwa ukuthi ukuhamba kwamabhasi sekumisiwe ngokuthi aletha abantu abangena elizweni okungekho emthethweni, singathini yikuzama impilo. Njalo kuthiwa kuhanjiswa abantu abangelazithupha zeCovid. Kade esiphathisa amabhasi ukuhambisa imphahla kumuli zethu.”
Omunye njalo osebenzisa amabhasi ikakhulu ukuphathisa imphahla, umnunzana Rodwell Moyo uthi inyathela elitsha liyadanisa.
“Lokhu kuyadanisa ngoba kusuka kuvalele labantu abamsulwa abasebenzisa amabhasi ngendlela eqondileyo. Labo abagangileyo ababotshwe.”
UMoyo uthi inyathela leli kumele likhangelisiswe ngoba labamabhizimusi basebenzisa amabhasi ukuphathisa imphahla yabo.
“Lokhu sekuzalimaza ngitsho labamabhizimusi abangalacala. Mina ngibona ukuthi inyathela leli lisuke labalukhuni kakhulu. Ngabe babamba bonabo abaphambanisayo bebajezise.”
Ihofisi yommeli weZimbabwe kweleGaborone kayizange icace ukuthi inyathela leli lizathatha isikhathi esingakanani. Kodwa ithi kuyadanisa abamabhasi babephiwe imvumo ngaphansi kwesivumelwano esizimele zodwa sokuthi benelise ukuchapha imngcele, kodwa bona sebesephula umthetho.
Ithi kodwa okudanisayo yikuthi imthetho emileyo kayizange inanzwe ngabakubhizimusi yamabhasi.
Imota ezincane kanye lezinye inhlobo zokuhamba zilokhe zivunyelwa ukudlula emngceleni.
