amalinks wokungena

Breaking News

Asibuyeli Ekusebenziseni Idola leMelika Ngoba Libulala Umnotho, Kutsho uMangudya


New Money Currency 3

Usibalukhulu weReserve Bank of Zimbabwe (RBZ) uMnu John Mangudya usegcizelele ukuthi eleZimbabwe alisoze libuyele ekusebenziseni idola leMelika njengensika yemali yalo ngoba lokhu kuyikubulala umnotho.

Kumbiko awethule izolo, uMangudya uthe ukwesulwa kwedola leZimbabwe okwenziwa nguhulumende ngomnyaka ka2009 kwaba liphutha elikhulu.

Wengeze wathi endaweni yokuthi imali yeZimbabwe imiswe ukusebenza, kwakumele iqhubeke isetshenziswa ndawonye lezinye izimali ezigoqela lona idola leMelika leRand lakweleSouth Africa.

Ngokunjalo, uthe eleZimbabwe lizaqhubeka lisebenzisa imali yalo lanxa nje ezinye ingcwethi labosomabhizimusi besithi limali kumele yesulwe ngoba ingelahlonzi kusetshenziswe eyaseMelika.

Kodwa ingcwethi zithi uMangudya uyaphazama ngoba amabhizimusi amanengi ehlela intengo ngedola leMelika esebenzisa isilinganiso somkambo wensitha ngenxa yokutshabalala kwemali yakuleli.

“UMangudya uyalahleka kakhulu, ubonisa kahle kamhlophe ukuthi kakaze ahlangane lalokhu okwenzeka empilweni yabantu abahlangana layo usuku ngosuku,” kutshi isiphathamandla senhlanganiso emela abathengi iNational Consumer Rights Association uMnu Effie Dlela Ncube.

“Nxa abantu besiyathenga amafutha ezimota, amabhuku, amayunifomu esikolo, begada izimota; konke abahlangana lakho kutsho ukuthi imali esisebenza yimali yaseMelika, iRand lenye imali yangaphandle.”

Amazwi kaNcube agcizelelwe ngunobhala jikelele wenhlanganiso emela izisebenzi iZimbabwe Congress of Trade Unions (ZCTU) uMnu Japhet Moyo.

“Umkambo uyala ukuthi imali yeZimbabwe ilohlonzi. UMangudya labanye bakhe bayaphambanisa. Umkambo uyatsho sobala ukuthi imali yakithi ayilahlonzi,” kutsho uMnu Moyo.

Kodwa usomabhizimusi olilunga leZanu PF uMnu Believe Gaule uthe uvumelana loMangudya.

“Akulalizwe elingaphila lingelamali yalo. Asingeke siwuvuselele umnotho welizwe sengelamali yethu sisebenzisa imali zangaphandle,” kutsho uGaule.

Uqhubeke wathi, “Imali yethu siyakwazi ukuthi ayilamandla sibili, kodwa kumele thina njengezizalwane zeZimbabwe, sibe yithi esiqala siyivume, sisebenze sivuselele umnotho wethu imali yethu ize ibe lamandla.”

UMangudya wazise njalo ukuthi usengeze imali engathathwa ngumuntu ebhanga ngeviki isuka kuZ$2,000 isiya kuZ$5,000.

Kodwa uNcube uthe lokhu akusoze kuphathise ngalutho.

“Lanxa kuyinto enhle kakhulu, iqiniso yikuthi abantu abasoze bayithole leyomali. Kungaze kuvuke namuhla kuthiwa umuntu usevunyelwa ukuthatha iZ$1 million, awusoze uyithole,” kutsho uNcube.

UGaule laye uthe ngempela uMangudya kumele alungisise udubo lokusilela kwemali lolu.

“Kuqakathekile ukuthi abantu nxa besiyadinga imali bayithole emabhanga. Kumele imali abantu bathi beyidinga emabhanga bayithole. Lokhu okokuthi abantu batshona belayinile emabhanga kubi kakhulu njengoSatane mhla exotshwa ezulwini,” uqhubeke esitsho uGaule.

UMangudya wazise njalo ukuthi amaqembu athile agoqela abantu abagogokileyo kanye labakupemtsheni yibo kuphela asebevunyelwa ukuthenga imali engangeUS$50 kuma bureax de change.

Esikhathini esedluleyo umuntu wonke ubevunyelwa ukuthenga limali. UMangudya uthi uguqule loluhlelo ngoba bekhona ekade sebelusebenzisa ukutshaphaza imali.

please wait

No media source currently available

0:00 0:05:23 0:00

Facebook Forum

XS
SM
MD
LG