amalinks wokungena

'Kaluqhutshwa Kahle Uhlelo Lwe Biometric Voter Registration Olwenziwa yiZEC'


Solukhutshulwe uhlelo lweBiometric Voter Registration olwenziwa yiZimbabwe Electoral Commission.

Abasakhulayo abahlala edolobheni leHarare bathi abakazwisisi uhlelo oseluqalwe nguhulumende lokubhalisa abantu kuluhlu lwamabizo abazaba lelungelo lokuvota kukhetho oluzakwenziwa ngomnyaka ozayo kusetshenziswa imitshina yakulezinsuku eye Biometric Voter Registration (BVR).

Isikhamuzi semzini weHighfields eHarare, uNkosazana Similo Maphosa, uthi uhlelo lwe BVR luzaba yinkinga emphakathini ngoba inengi lingazwisisi kahle ukuthi abekhomishini ebona ngezokhetho eye Zimbabwe Electoral Commission (ZEC) bakwenza njani njalo ngayiphi injongo.

Osakhulayo, uNkosazana Maphosa, wengeze esithi uzulu kayithembi iZEC le ekhokhelwa nguNkosikazi Rita Makarau, ngakho-ke abantu abangakazwisisi uhlelo lolu bazahlala besithi ngolwe ZANU PF besebezitshedeza khatshana lalo.

Inkulumo le igcizelelwe yingcitshi yezombusazwe, uMnu. Hapson Ncube, othe uMakarau wehlulekile ukufundisa abantu ngaloluhlelo njalo sewaziveza ukuba ngumuntu weZANU PF kudala osekubangela ukuthi uzulu anga kholwa kunhlelo zeZEC.

UNcube wengeze wathi isikhathi okufuze abantu babhalise njalo bafunde ngaloluhlelo sincane okokuthi inengi lizakhalala okuzabangela ukuthi ukhetho lomnyaka ozayo luphele ngokukhonona phakathi kwamabandla azadibana.

Osakhulayo, uMnu. Thembani Khumalo, uveze ukuthi uhlelo lwe BVR luphethwe ngendlela engayisiyo yiZEC yikho inengi labantu lingazi lutho ngalo.

UNkosazana Sithandazile Moyo laye uthe akakabhalisi njalo kazazi indawo ezibhaliswa kizo uphinde wathi iulwazi ngalezi ndawo alukho ebantwini ngaloludaba kungenxa yokuthi iZEC yona yehluleke ukukhuthala emsebenzini wokufundisa abantu ngalolu hlelo.

Uhulumende usesibalalise uhlelo lwe BVR eziqinti zonke zelizwe lokho okuzakwenza ukuthi abantu benelise ukuvotela eduze lalapho abahlala khona.

Inhlanganiso ezizimele zodwa zithi lokhu kuzancedisa ukuthi abantu babhalise ukuvota kukhetho lomnyaka ozayo.

Facebook Forum

XS
SM
MD
LG