Inengi labantu emaphandleni liveze ukuthi lisemnyameni ngomkhakha omutsha wegcikwane leCoronavirus, owe Omicron njalo liqhubeka lisephula iziqondiso zokuvikela leligcikwane, eselimemetheka lasezikolo.
Lanxa inani labahlaselwe ngumkhuhlane weCOVID 19 liqonga mihla ngemihla ukudingisisa okuqhutshwe yiStudio 7 kuveza ukuthi inengi lezakhamizi emaphandlani lilokhe lingalandeli iziqondiso zokuzivikela lumkhuhlane.
Izakhamizi esixoxe lazo zithi iyadingeka imfundiso ngomkhakha omutsha oweCOVID 19. Nangu uMnu. Finitshi Ncube kuWard 7 koMalaba eMatobo.
UMnu. Ncube wengeze wathi lalapho begula kubanzima ukufinyelela amakilinika ngoba ekhatshana.
UNkosikazi Siphathisiwe Nkala oweSilikwe eGwanda North uthi inengi elahlaba ijekiseni yokuvikela i-COVID 19 likholwa ukuthi alingeke lisawubamba lumkhuhlane kungakho liyekethisa ukulandela iziqondiso zokuzivikela.
Osakhulayo uArnold Moyo wakoBeula eMatobo uthi limkhuhlane usazomemetheka ngamandla ngesikhathi sekhefu lekhisimusi lapho uzulu ezahlangana evela endaweni ezitshiyeneyo.
Umkhuhlane weCOVID 19 usumemetheka lasezikolo zemaphandleni, kutsho uMnu. Urgent Moyo umqondisi wenhlanganiso yababalisi eyeProgressive Teacher’s Union of Zimbabwe eZansi yemaNdebeleni.
UMnu. Moyo uphinde wathi lanxa isimo sinjalo inengi kalikahlolwa.
Umqondisi wogatsha lwezempilakahle eZansi yemaNdebeleni uNkosikazi Rudo Chikodzore utshele lumsakazo ukuthi balawo ama testing kits ayeneleyo emakilinika lasezibhedlela zemaphandleni njalo labo abafisa ukuhlolwa kumele baxhumane lama Rapid Response Teams endaweni zabo.
Okwamanje sebefika phose inkulungwane eyodwa lamakhulu amahlanu 1481 abaphethwe ngumkhuhlane weCovid 19 esabelweni seZansi yemaNdebeleni.
Abezempilakahle bakhuthaza uzulu ukuthi alandele iziqondiso zokuvikela lumkhuhlane ezibalisa ukugqoka amamask, ukugeza izandla njalonje, ukungasondelelani kanye lokuhlatshwa ijekiseni yeCOVID 19 vaccine.
