Uhulumende uthi uzabopha abantu abethule umbiko wamanga obusithi umsekeli kaMongameli weMDC Alliance uMnu Tendai Biti uthunjwe ngabesilisa abahlanu ekade behlomile.
Kumbiko awethule izolo, umphathintambo obona ngendaba zasekhaya uMnu Kazembe Kazembe usole lelibandla esithi lilomkhuba wokuqamba amanga ngokuthunjwa kwamalunga alo afana loJoana Mamombe labanye bakhe ngenjongo yokungcolisa uhulumende weZanu PF.
Amazwi la alandele umbiko obikwa wethulwa ngenye inkundla yezindaba owawusithi uBiti uthunjiwe.
Kodwa isikhulumeli seMDC Alliance uNkosazana Fadzai Mahere waphanga wawulandula lumbiko esithi ungamanga aluhlaza. Ukucacisile njalo ngoLwesithathu ukuthi lokhu akuzange kwenzeke njalo ayisilo bandla lakhe elethula lumbiko.
Lanxa kunjalo, uMnu Kazembe usole lelibandla esithi lithethe isikhathi eside ukuyiqondisa lindaba. Ngokunjalo, uthe amapholisa azathathela bonke abalokwenza lombiko lo amanyathelo.
Isiphathamandla seMDC Alliance eMelika uMnu Tim Muringai utshele iStudio 7 ukuthi uhulumende udinga nje ukuhlukuluza ibandla lakhe ngoba njengokutsho kukaMahere, ayisilo elathi uBiti uthunjiwe.
