amalinks wokungena

Breaking News

Uzulu Uchothoza iMedia Commission Bill Ebunjwa Lidale Lephalamende


Abantu abahambe emhlanganweni wokucubungula okumumethwe ngomthetho obunjwayo.

Kulabanye abantu abathi umthetho ololongwa okwamanje owokwethulwa kwezindaba oweZimbabwe Media Commission Bill kukhanya uzanika uhulumende amandla amanengi okwenza santando.

Bathule lokhu ngoLwesibili ngesikhathi amalunga edale lephalamende exoxisana ngokulolongwa komthetho lo okumele ungene esikhundleni somthetho osuswayo oweAccess to Information and Protection of Privacy Act (AIPPA) okuthiwa uncindezela uzulu lentathelizindaba ekwethuleni imibiko etshiyeneyo.

Omunye wabasola iZimbabwe Media Commission Bill nguNkosazana Nobesuthu Ngwenya, ofundela ukuthapha indaba eZimbabwe Open University, othi umthetho obunjwayo upha umphathintambo wokwethulwa kwemibiko amandla amanengi.

USomabhizimusi osakhulayo, uNgonidzashe Koloke, uthe abasuthiseki ngokubotshwa kwentathelizindaba lapho zithe zephula ilungelo loluntu.

Intathelizindaba edumileyo, uNkululeko Sibanda, uthe uhulumende kalalungelo lokulawula ukusebenza kwabo.

''Indaba esiyibeke kuqula lephalamende yikuthi kuyadingeka ukuba uhulumende engabi lesandla ekusebenzeni kwentathelizindaba ngoba silamandla okuzikhuza. Ezikhathini ezedluleyo sibone ukuba inengi lethu liyavalelwa emajele bengelacala kukanti odokotela balakho ukuphambanisa kodwa ababotshwa bayebolela ejele bayazilawula uhulumende kalasandla ekusebenzeni kwabo uma kuqathaniswa lathi.''

UNkosazana Prosper Masibi, ofundela ukuthapha indaba eLupane State University, uthe umthetho obunjwayo awukhulumi ngemali yokusebenza kukhomishini.

UNkosazana Abigail Siziba, ofundela ukuthapha indaba eNational University of Science and Technoloy, laye usole amandla aphiwe umgcinisihlalo wekhomishini.

Umgcinisihlalo wekhomithi yedale lephalamende ebona ngokwethulwa kwemibiko lezemisakazo eyeZimbabwe Parliamentary Information and Broadcasting Services, uMnu. Prince Dubeko Sibanda, uthe bazama ukuthi bezwe imibono kazulu iZimbabwe Commission Bill ingakabi ngumthetho welizwe leZimbabwe.

“… Senza imihlangano yokuthapha imibono kazulu. Izolo besiseGweru, kusasa siyavuka siseMasvingo, siye eMutare siqeda laho siye eHarare sibuza abantu ukuthi lumthetho bawubona njani ngoba ngowabo.''

Ikhomithi yedale lephalamende ikhangelele ukubuyela njalo edale isiyahlaziya imibono kazulu iqondisa iZimbabwe Media Commission Bill kulandelwa leyo mibono.

Intathelizindaba kulo umhlangano zisole njalo ukuqonga kwenhlawulo yokuphiwa imvumo yokuyaloba ngezokhetho, ezemidlalo lokunye zisithi inengi kakhulu.

Ziphinde zasola ukungaphathwa kahle ngabezomvikela labalondoloza ukuthula emihlanganweni bethi balobandlululo ikakhulu kulabo abazimeleyo labasebenzela uhulumende.

Udaba Esilethulelwe NguAnnastacia Ndlovu
please wait

No media source currently available

0:00 0:04:28 0:00


Facebook Forum

XS
SM
MD
LG