amalinks wokungena

Breaking News

Badlala ikhisimusi emunyu abeZimbabwe kweleSouth Africa


Ibe yiKhisimusi emunyu kakhulu kuzinkulungwane zezizalwane zeZimbabwe ezivalelwe emngceleni weBeitbridge zizama ukuchapha ukuyakudlala ikhefu lezihlobo labangane ekhaya.

Lobanje abanengi besebechaphile umngcele, iKhisimusi iqale belokhu bengakafiki emakhaya.

Ikhisimusi yalonyaka ichazwe mngceke yingoma yomculi weRhumba uThemba Boyoyo Mathe ekhuluma ngosizi, umbuqazwe icoronavirus ephenduke yabayiyo ikhisimusi kunengi lezizalwane zeZimbabwe kweleSouth Africa.

Bekufanele kube lilanga lenjabulo lokuhlangana lezihlobo labangane kuxoxwa, kudliwa amakhumukhumu kugidwa kuluthuli. Kodwa kuzizalwane zeZimbabwe esezilamalanga zisehluleka ukuchapha emngceleni weBeitbridge bekulikhisimusi lendlala, ukoma ukuxathulwa lilanga losizi olukhulu kakhulu.

Esinye isiphathamandla sogatsha lwendaba zasekhaya eBeitbridge sitshele abezindaba ukuthi bathole imbiko yokuthi kulabantu abaphose bafike itshumi kugoqela labatshayeli bamaroli abafe besendwendweni zokuzama ukuphuma emngceleni weBeitbridge. Lokhu kubikwa kubangelwe yikoma, ukutshisa, indlala, lokudinwa ngemva kokuqeda insuku imota zabo zisehluleka ukuchapha umngcele. Ikhona njalo imbiko layo ebingakagcizelelwa ngamapholisa ethi kulabeZimbabwe abathile abathethwe ngumfula uLimpopo sebezama ukuchapha emanzini baye ekhaya.

Esinye isizalwane seZimbabwe esingathandanga ukuziveza igama besilubhekise eGokwe kodwa sazithola sesidlalela ikhisimusi emngceleni weBeitbridge.

“Sihambe 2 days. Egoli sisuke ngemva kwayizolo, sazodileya from eLouis kube ne accidentinyana. Just after Louis sahamba sithe ma sifika eMusina etown sathola kunetraffic. Safakwa egroundini somewhere sapakwa imoto zaba zinengi until now yikhona sisazophuma. Kutsho ukuthi vele sihambe 3 days, asikafiki lapho esiya khona.”

Umnumnzana Xolisani Khanye yena uze wasuka emngceleni ekuseni elokhu ethwele ukudla kwekhisimusi okulindelwe yizihlobo zakhe ekhaya.

“Uyayibona indawo leyi ukuthi vele igcwele kanjani. So, nathi besi ku expector khonalokhu esesikutholile ukuthi sizathola kule congestion e so. But sizothini at least sesincengile ngoba vele sifike ekuseni kakhulu. But akufani ngoba asithathanga ilanga lonke.”

Kusenjalo umqondisi wogatsha lwezempilakahle kweleSouth Africa umnumnzana Sandile Buthelezi uthi sebeyekethekisile eminye imigoqo yeCovid-19 ebibangela ukuminyana emngceleni lo ikakhulu kubatshayeli bamaroli. Lokhu uthi sekwenze indwendwe zabaphumayo zaphunguleka kakhulu.

Inengi labeZimbabwe lonyaka badlalele ikhisimusi eGoli ngenxa yokuswela imali kanti abanye besabile ukuya ekhaya ngesikhathi umkhuhlane wecoronavirus usidla amahabulo.

Isizalwane seZimbabwe umnumnzana Dumiso Gama uqede ikhisimusi yonke ezivalele endlini.

“Sihlezi ezindlini siyesaba ikakhulu thina esilabo BP ngoba ikhona icorona iyabulala futhi. Labakuvakashelayo uzwa usesaba ukuthi la la adlule khona angabe edlule eyithola ndawana thizeni uzwe usesaba. Likhisimusi elinzima likhisimusi elibuhlungu.”

Umnumnzana Nkululeko Mathe laye uthi bekulikhisimusi elimunyu okumangalisayo.

“Hayi iChristmas yalonyaka ayifani leChristmas yeminye iminyaka esiyidlileyo silokhu sazalwayo. Inzima mpela. Asikaze siyibone iChristimas enje. Siyidlela ezindlini. Asiyanga emakhaya kunzima mpela. Siyezwa labanye bayakhala emaborder lapha bathi selokhu bahambayo bahleli emaborder. Lokhu kunzima okwalonyaka. Lokhu icovid isenzele okunye.”

Labo abenelisileyo ukuphumela phandle bathi bayidlele evalweni njengoba kuse sekuthiwa inani labahlaselwe yileligciwane izolo kuphela liphezu kwezinkulungwane ezilitshumi lane (over 14,000) okulinani eliphezu kwawo wonke amalanga selokhu icoronavirus yangenayo eMzansi.

UThemba Boyoyo uthi ngempela ikhisimusi yalonyaka ingenelwe yimpi yatshaya yafohloza.

Udaba lweKhisimusi emunyu kwabeZimbabwe abaseSouth Africa siluphiwa nguThuso Khumalo
please wait

No media source currently available

0:00 0:09:09 0:00

Facebook Forum

XS
SM
MD
LG