Umthetho osekulolongweni wokuguqulwa kwesisekelo sombuso okwesibili, okhangelelwe ukuhlafunwa edale lephalamende kunsuku ezilandelayo, umumethe ukwengezwa kwesikhathi sokusebenza kweziqondiso zokuba sedale lephalamende kwabesifazana abakhethwa phansi kwezigaba okubizwa ngokuthi yiProportional Representation, okweminyaka elitshumi.
Abesifazana beMaNdebeleni bamukele ngemibono ehlukileyo ukwengezwa kweminyaka yeProportional Representation edale lephalamende abanye besithi kuhle kwathi njalo abanye bathi kumele kube lomthetho othi inani lokungamatshumi ayisikhombisa kumele ubengumthetho ohlala ukhona hatshi ocelwayo.
UNkosikazi Mildred Sandi, olwela amalungelo abesifazana, uthi kuqakathekile ukuba uhle ube ngumthetho opheleleyo.
UNkosikazi Hariet Nkomo uthi kuyajabulisa ukungezelwa kweminyaka yeProportional epresentation.
Esinye isakhamuzi sakoBulawayo, uNkosikazi Jane Mlalazi, uthi bayakwamukela lobanje bengaphiwa amathuba okukhuluma emihlanganweni eyakha isizwe.
UNkosikazi Tisa Nare uthi kuhle kodwa bakhangelele umbuso wezabelo ukuze wonke umuntu ongumama aphatheke hatshi ihlekana.
Isisekelo sombuso esitsha esabangumthetho wesizwe ngomnyaka ka2013 kusahluko 124 (b) sasiphe amabandla aphatheka kukhetho ukuba ibandla lebandla lizaphiwa izihlalo phakathi kwezihlalo ezingamatshumi ayisikhombisa kusiya ngokuthi bathole amavoti amangaki esigabeni okweminyaka elitshumi okukhangelele ukuba kuphele ngesikhathi ilizwe lisiya ekhethweni ngomnyaka ka2023.
Kodwa ukuguqulwa kwesisekelo sombuso kwesibili kungaphumelela edale loMongameli Emmerson Dambudzo Mnangagwa akuvume ngokusayina kubengumthetho, kutsho ukuthi iProportional Representation izaqhubeka njalo okweminyaka elitshumi.
