Amalunga edale lephalamende ayisitshiyagalolunye ezansi yeMaNdebeleni akhala ezimathonsi ngemva kokunqotshwa kukhetho lwamaprimaries.
Iziphathamandla zeZanu PF ezakul’umhlubulo inengi lazo ezilezikhundla eziphezulu zicine zithatha isinqumo sokungemukeli impumela yokhetho lolu olwenziwe ngeviki ephelileyo.
Lokhu kuphume emhlanganweni ongenwe ngabanqotshwe kukhetho ababalisa, umphantintambo wezenzakala ezansi yeMaNdebeleni, uMnu Abedinico Ncube, umgcinisihlalo walelibandla kulumhlubulo, uMnu Rabelani Choeni, kanye lomeli wedale lephalamende eInsiza North, uMnu. Malaki Nkomo.
Lumhlangano uthethe isinqumo sokuthi impumela yokhetho lwama primaries ingemukelwa ngakho-ke ukhetho luzamele luqhutshwe kakutsha.
UNkomo uthi ukhetho lolu alulandelanga iziqondiso zebandla.
Ingcwethi kwezombusazwe, uMnu Bekezela Maduma Fuzwayo, uthi isinqumo esithethwe yilelibandla siveza obala iZanu PF uqubo.
Isikhulumeli seMDC-T ezansi yemaNdebeleni, uMnu Ekem Moyo, uthi abantu laba kumele bevume ukuthi uzulu usefuna inguquko.
Esinye isinqumo esithethwe kulumhlangano yikuthi obone ngokuqhutshwa kokhetho lwama primaries uMnu. Engelbert Rugeje kumele asuswe esikhundleni.
Amapholisa lawo ayetheswa umlandu wokuncedisa ukuqilibezela kulolukhetho njalo ibandla leZanu PF lithi selilamabizo alabo abasebenzise amapholisa ukuqilibezela.
Abanqotshiweyo babikwa besethesa umlandu elinye icele leZanu PF eleGeneration 40 kanye leliphikisayo ele MDC-T besithi abalandeli babo bavotile kukhetho lolu.
