UMongameli Emmerson Mnangagwa, obesemhlanganweni oweUnited Nations Climate Change Conference eScotland, uhlangabezwe ngabantu abanengi emagcekeni endizamtshina eRobert Gabriel Mugabe International Airport.
Akwaziwa ukuba uphatheleni abantu kwele Zimbabwe ngesikhathi ukukhudumala komkhathi kuthwalise nzima abantu emhlabeni wonke jikelele.
UMnu. George Charamba, isikhulumeli sikamongameli, ulobe enkundleni yokuxhumana eyeTwitter esithi ubunengi babantu emgcekeni endizamtshina kuveza ukuba uMnangagwa uthakazelelwa ngabantu.
Uthi kunengi akwenze eScotland, okugoqela imihlangano lenkokheli yamazwe afakela izijeziso zenotho abakubandla leZanu PF. Kakhulumanga ngokuzakwenziwa ngele Zimbabwe kulandela umhlangano lo omkhulu obuhlolisisa amagqinga okuvimba ukukhudumala komkhathi.
UMnu. Believe Gaule, okubandla leZanu PF, uthakazelela okwenziwa nguMnangagwa.
UNkosazana Rejoice Moyo, ingcwethi ebona ngeswelo zikazulu, uthi abantu babhekane lobunzima emaphandleni ngenxa yokukhudumala komkhathi.
UNkosazana Moyo uthi kunengi okumele kwenziwe eZimbabw eukwenzela ukuthi abantu baphile kahle.
Lokhu kusekelwa ngumlimi ofuya inkomo, uMnu. Methuseli Moyo, othi akudingwe indlela ezintsha zokuvimba ukukhudumala komkhathi.
EleZimbabwe, elihlutshwa yikuswelakala kwemali, lithi lilenhlelo ezinengi ezilakho ukuvimba ukukhudumala komkhathi. Akwaziwa ukuba lizathola imali kumbe hatshi eyabelwa yinhlanganiso yeUnited Nations eyokuvimba ukukhudumala komkhathi.