amalinks wokungena

Breaking News

Bakhala ezimathonsi abeZimbabwe kweleSouth Africa ngezimfa ezibangelwa yiCovid-19.


Funeral home workers in protective suits carry the coffin of a woman who died from COVID-19 into a hearse in Katlehong, near Johannesburg, South Africa,

Izimfa ezibangelwa yicoronavirus kweleSouth Africa ziyaqhubeka zibangela usizi olukhulu lakuzizalwane zeZimbabwe. Isizalwane seZimbabwe unkosazana MaTshuma, okungasogama lakhe lamampela ngoba engathandanga ukuvezwa igama, uthi umkhuhlahle wecovid-19 ubenzele abangakaze bakubone selokhe bathwetshulwa yingwe.

“Thina singumdeni silahlekelwe ngubaba ukuqala kwe 3rd wave la eGauteng. Ubaba ugule iviki eyodwanje waya esibhedlela waseshona. Kunje umama laye wabuya esizwa ngomkhuhlane wahle wagijima weza Egoli. Umama laye ekushoneni kukababa wahle waqala ukugula. So kuthe after 2 weeks umama laye walandela.”

Isikhulumeli sebandla leZapu kweleSouth Africa umnumnzana Canicious Nkala uthi lamalunga ebandla lakhe aphelile ngalesi sifo.

“Silahlekelwe kakhulu singuZapu. Abanye abakade bekupresidium sikhuluma ngomama uMrs Taka, ubaba uThodlana, several other struggle heroes ebesilabo kubandla lethu leZapu. Yisikhathi esinzima secovid esikhuluma ngaso kodwake siyabonga ngemisebenzi emihle abayenzileyo.”

Isikhulumeli senkampani yezemingcwabo iDawu Funeral Services umnumnzana Marko Thebe uthi basele bengelamathe ngemva kokuba lesi sifo sithethe umsunguli wale inkampani.

“This thing kills of which silahlekelwe ngomunye wethu umsunguli wenkampani eyeDawu Funeral Services. Uthethwe yiso isifo solesi esecoronavirus. Lo umkhuhlane lo eqinisweni ubuhlungu njalo uyabulala. Mina sengiphuma khona ngiteste positive last of last month mhlaka 27 June. Ngize ngayarecover lapho kubo 28 July.”

Ngokombiko owethulwe lugatsha lwezempilakahle kweleSouth Africa, bazinkulungwane eziyisitshiyagalolunye (9,000) abantu abahlaselwe yicornavirus izolo kuphela, kanti ababulewe yilo umkhuhlane ngesikhathi esifanayo bedlula amakhulu amahlanu lengxenye (555).

Lokhu sekuthethe inani lasebefile selokhu lumkhuhlane uqalile nyakenye laya kwabedlula izinkulungwane ezingamatshumi ayisikhombisa (72,992).

Lokhu kwenzeka ngesikhathi iziphathamandla ziveza ukuthi ihlandla lethird wave yokuhlasela kwecovid-19 seledlule njengoba inani labahlaselwayo selehlile lapho abelidlalela khona kwabazinkulungwane ezingamatshumi amabili (from around 20,000) laya phansi kwezinkulungwane ezilitshumi (below 10,000).

UMatshuma uthi usizi olukhulu kunengi labeZimbabwe abafelwa yizihlobo zabo yikuthi zingcwatshwa bengelathuba lokubona imizimba yabo.

“So ekushoneni kwakhe asimbonanga okokugcina ngoba ubegoqelwe ngamaplastic. So asikwazi ukuthi umuntu owangcwatshwayo nguye yini ubaba kumbe kayisuye.So ubaba wavela wasuka esibhedlela wahle waqonda straight amortuary. Ukuthi sibe kwazi ukuthi nguye noma kayisuye asikwazi.”

Abanye njalo bakhala ngokuswela indlela zokuhamba ekhaya besiya emingcwabeni njengoba inengi labo balahlekelwa yimisebenzi, kanti lemithetho kahulumende ayivumeli ukubuthana kwabantu abanengi kule imingcwabo.

Umnumnzana Nkala uthi ubunengi bezimfa ezibangelwa yilo umkhuhlane sebenze labo abebecabanga ukuthi lumkhuhlane awukho bayifunde ivaliwe.

“Asitholeni ukuthi sivaccinetwe silungiselele ukwenzela ukuthi nxa kufika isikhathi umzimba wakho usumalasotsha omzimba azakwazi ukumelana lalokhu. Ivaccination kudala vele ikhona, usungaba lamafears ubelani okukhona lokunengi okukhulunywa ngabantu kodwa kuqakathekile ukuthi uhlale uvikelekile.”

Umnumnzana Thebe laye uthi ukuzivikela kuqakathekile kakhulu.

“So mina ngiququzela kakhulu ukuthi abantu abagqoke ama mask, basanithayize bageze lezandla. Kuqakathekile bakithi coz lomkhuhlane uyabulala bakithi.”

Sebesiyafika kuzigidi ezimbili legxenye (close to 2,5 million asebehlaselwe ngumkhuhlane wecoronavirus kweleSouth Africa. Loba kunjalo uhulumende akakuvezi kuzibalo zakhe ukuthi bangaki abakwamanye amazwi abakunani leli lakunani lasebebulelwe yilo umkhuhlane.

Facebook Forum

XS
SM
MD
LG