amalinks wokungena

Breaking News

Bakhala Ngodubo Lokusilela Kwamabhasi koBulawayo


Baminyezelana ukungena ebhasini koBulawayo

Izakhamizi zakoBulawayo zikhala ngodubo esezibhekane lazo lokusilela kwezimota lamabhasi athwala abantu ukuya emsebenzini lokuphindela emakhaya.

Inengi selibanjwa ngamandla ukuhamba liphenduke emsebenzini ngenyawo lobanje uhulumende ekhuphule imbadalo yokugada amabhasi enkampani yakhe eyeZupco, ngeNsonto.

Lokhu kwenzakala ngesikhathi uhulumende eqinise iziqondiso ezeLockdown ngokwalela abantu ukuhambahamba phakathi kwehola lesithupha ntambama kusiya ngehola lesithupha ekuseni, iCurfew ka6pm kusiya ku6am.

Inengi lithi selibanjwa ngamandla ukwephula iziqondiso zeCurfew lezo ngoba nxa bezahamba ngenyawo ukuthi bafinyelele isikhathi somsebenzi kuzamele bavuke baqale ukuhamba ihola lesithupha lingakatshayi ekuseni. Kuthi lantambama beqeda umsebenzi bayabe batshayelwa ngu6 besendleleni bephindela emakhaya.

Isakhamuzi sakoBulawayo, uNkosikazi Nomvuyo Nyathi uthi sebekhathele ngokuhamba ngenyawo.

“Thina bakithi sikhathele eZimbabwe, asisakwazi ukuthi Senzeni koBulawayo, sidla imbuia ngoluthi akusodubo oluncane ezweni, usuka ePumula ngenyawo uzobamba edolobheni, Sicela uMongameli asicabangele akusidubo oluncane lolu.

Esinye njalo isakhamuzi sakoBulawayo, uNkosikazi Lydia Mafa uvumelane loMaNyathi.

“Thina sesikhathele koBulawayo ngodubo lwetransport, imizimba isibuhlungu, uhulumende kabone ubungcono abuyisele imitshova le ayikhuphayo ngoba abantu sebehamba ngenyawo uZPCO kalamafutha ezimota, Siphilanzima umuntu ungena emsebenzini ngo10.”

Esinye njalo isakhamuzi sakoBulawayo uBridget Mpofu uthi bayaswela izimota zokubathwala sebehamba ngenyawo.

“Sesiphila nzima akulazimota zokuthwala abantu besiya emsebenzini, uZUPCO uthi kalamafutha ezimota. Inengi Labantu selihamba ngenyawo. Sicela uhulumende angenele ngoba sesiphilanzima ezweni.”

Olwela amalungelo oluntu, uMnu Mbuso Fuzwayo uthi kuyethusa ukuswela kwabantu imota zokuhambisa khona kuleCurfew.

“Okwenzakalayo kuBulawayo ngokuswela itransport ngoba ekuseni kumbe ntambama ngo6 kungelatransport kuyethusa khona kuleCurfew kutsho ukuthi uhulumende uzabatshaya kufake abantu engozini ukuba umuntu ahambe ngesikhathi kulecurfew.”

Umphathintambo wedolobho lakoBulawayo, uNkosikazi Judith Ncube uthe kulandela ukusilela kwezimota ezithwala abantu edolobheni usekhulume labomthetho ukuthi bayekethise umthetho wokubopha labo abephula isinqumo sokungahambi ebusuku kusukela ngehola lesithupha kusiyafika ekuseni ngehola lesithupha njalo ngoba kulohlupho lwezimota zokuhamba edolobheni.

Udaba lokusilela kwamabhasi koBulawayo siluphiwa nguAnnahstacia Ndlovu
please wait

No media source currently available

0:00 0:03:46 0:00

Facebook Forum

XS
SM
MD
LG