Ezinye izizalwane zeZimbabwe ezihlala kwele Botswana zikhonona ngokuthi kazinxuswanga emhlanganweni ozakwenziwa kusasa nguMongameli Emmerson Mnangangwa labantu abahlala kulelilolizwe ngesikhathi esedolobheni leGaborone.
Abakhulume lomsakazo weStudio 7 bathi abakwazi ukuthi bakhethwe njani abantu abazahlangana loMnangagwa okhangelelwe ukuthi uzahlala kwele Botswana okwamalanga amabili.
Badane okumangalisayo abantu akade befuna ukubona uMnangagwa owasusa uMnu. Robert Mugabe esikhundleni ngoLwezi nyakenye encediswa libutho.
Omunye wabakhonona ngokuthi kanxuswanga nguMnu. Andreas Sibanda, obefisa ukwethulela uMnangagwa konke okusesifubeni sakhe.
“Siyakwamukela ukubuya kukamongameli kodwa osekuphambanisekile yikuthi bakhethe abantu abazahlangana laye. Sitshiyene (siseBotswana) abanye basemapulazini, abanye basemahofisini kukanti abanye abalamaphepha, ngakho asikwazi ukuthi njengoba kukhethiwe, osimeleyo ngubani.”
Akucacanga ukuthi abazahlangana lomongameli kade bekhethwa njani. Esesinye isisebenzi ehofisini yommeli weZimbabwe kwele Botswana sithi kade kusiba lemihlangano ehofisini le emavikini asanda kwedula, kulungiselelwa ukwethekelela kuka Mnangagwa.
Abazangena umhlangano lo, ozakwenzelwa eGaborone International Convention Centre, sebephiwa incwadi zokubanxusw, njalo kubikwa inengi kungosomabhizimusi.
Esinye isizalwane seZimbabwe, uMnu. Stan Ncube, uthi ubelesifiso sokuhlangana loMnangagwa njalo ambuze imbuzo ephathelene lempilo yabo njengezizalwane zeZimbabwe.
“Silapha eBotswana ngenxa yezinqumo zikahulumende owadlulayo … uMnangagwa wayengumphathintambo yonke limnyaka. Khathesi usengumongameli ngakho besifisa ukumbuza imbuzo, kodwa abehofisi emmela iZimbabwe eBotswana basitshele ukuthi sebakhetha abazahlangana lomongameli, noma nje singakwazi ukuthi kukhethwe njani. Bekumele asihlanganise sikhulume laye asitshele ukuthi sikhangaleleni (kumbuso wakhe).”
Omunye njalo ohlala kwele Botswana, Mnu. Dumisani Ncube, uthi nxa uMnangagwa efisa ukuzwa izikhalo zabantu abanengi kwele Botswana, bekumele kunxuswe abantu abanengi hatshi ukuthi kubelehlekana.
“Uma umongameli ubefuna ukuhlangana labantu abeZimbabwe bekumele kunxuswe wonke umuntu ongayenelisa ukuba khona. Labo abangafiki eEmbassy bona bazabakwazi njani ukuthi kulomhlangano ukuze labo batsho abafisa ukukutsho njengabeZimbabwe kweleBotswana?”
Abanye njalo bacabangela ukuthi bekuhluzwa labo abazahlangana loMnangagwa, kusesatshelwa okufana lalokho okwenzakala eSouth Africa lapho abanye abesiNdebeleni abatshengisela bemtshela ukuthi ungumbulali, ngesandla abalaso kumbhuqazwe oweGukurahundi.
Umongameli Mnangagwa uzabe eseBotswana kulandela ukunxuswa kwakhe ngumongameli Ian Khama ukuthi azokwethekelela okwamalanga amabili lapho azakhuluma edale lephalamende njalo lenkampani elolonga amadayimana eye Diamond Trading Company eseGaborone.
