amalinks wokungena

Breaking News

Bakhala ngoLoga Abalandeli Beqembu Lenguqu Elimela Isizwe eleZimbabwe Warriors


U-Zdravko Logarusic umqeqetshi weqembu elimela isizwe emdlalweni wenguqu, elamaWarriors
U-Zdravko Logarusic umqeqetshi weqembu elimela isizwe emdlalweni wenguqu, elamaWarriors

Abalandeli bomdlalo wenguqu bayakhonona kakubi besola umqeqetshi weqembu lesizwe, elamaWarriors, uZdravko Logarusic, ngokudlali kuhle kwaleli qembu ikakhulu khathesi kumncintiswano oweCOSAFA okulakho ukudala leli qembu liphume kuwo.

Kumidlalo yenkezo ye COSAFA iqembu leli selidlale imidlalo emithathu, laba ngutshiki lobhanqa kabili, lanqotshwa emdlalweni owodwa.

Ekhuluma ekupheleni komdlalo wesithathu odlalwe ngeSonto - wona ophele iqembu le Zimbabwe linqotshwe nge 2 ka nya ngele Namibia – uLoga uthe ithemba lisasekhona ukuba iqembu leli lingadlulela kusigaba esilandelayo esomncintiswano.

“Ngiyajabula ngengikubonileyo emdlalweni. Inengi labafana laba ngabasakhulayo njalo lesi yisifundo esihle kubo.

Kumele siqhubekele phambili silwisa mhlawumbe impumela yemidlalo ezayo ingahambelana lathi. Kwazi bani kungenzakala izimanga emdlalweni wokucina sizithole lathi sesiphutshe sisendaweni yesibili engalaneni yemiklomelo.

Kuzwekazi lase Africa loba yiliphi iqembu liyenelisa okunqoba yiloba yiliphi elinye njalo kuzamele sibophe ziqine emdlalweni wethu owokucina,” kutsho uLoga.

Iqembu lama Warriors selidlale imidlalo elitshumi lanye liqeqetshwa ngumqeqetshi uLoga, oyisizalwane selizwe le Croatia, njalo kuleyomidlalo linqotshwe emidlalweni eyisithupha, laba ngutshiki lobhanqa emidlalweni emine, lanqoba kanye.

Ocubungula ezemidlalo uWashington Sibanda uthi uLoga kungcono inhlanganiso ye Zimbabwe Football Association itshiyane laye kungakawonakali kakhulu.

“Imbali yakhe iyazikhulumela ukuba lo ngumuntu owehlulekayo. Sikhangelele ukuba laba ababona ngezomdlalo wenguqu elizweni, abe Zifa, bamkhulule abuyele kubo ngokuphangisa.

Kumele badinge omunye ozasiqhuba ngoba singaqhubeka silokhu sihamba lo Loga angiboni sifika ndawo,” kutsho uSibanda.

Banengi kabi abalobe emakhasini okuzilibazisa awebulenjini bekhuthaza ukuba uLoga kakhonjwe indlela eya kubo ngemva komdlalo weqembu lama Warriors lapho elitshaywe khona 2 ka nya ngele Namibia ngeSonto.

Phambilini kwalumdlalo iqembu leli belibe ngutshiki lobhanqa 0 ka 0 lele Mizambique laphinda laba ngutshiki lobhanqa 2 ka 2 lele Malawi.

Emdlalweni walo owokucina owesibaya sika Group B iqembu le Zimbabwe lizadlala lele Senegal ngoLwesibili.

Amaqembu azaqeda ehlezi endaweni ezimbili eziphezu kwengalane kusibaya sika Group A lakusibaya sika Group B yiwo azadlulela kusigaba esilandelayo somncintiswano wenkezo ye COSAFA

XS
SM
MD
LG