Ibandla leMthwakazi Republic Party (MRP) lithi amalunga alo azatshengisela eMpilo Hospital ngoMvulo ekhonona ngokutshiywa phandle kwabantu abadabuka eMatabeleland leNkabazwe kunhlelo zokufundisa abantwana ukuba ngabongi labongikazi.
Umongameli webandla leMRP, uMnu. Mqondisi Moyo, uthi kukhangelelwe ukuthi kuzabe kulabantu abanengi abazatshangisela esibhedlela lesi okulabantwana abanengi abasanda kungena ezifundweni lezi abadabuka kwenzinye indawo zelizwe.
UMoyo uthi banengi abantwana abaphumelela ezifundweni okumele bangene kuzifundo zabongi ezibhedlela zonke zelizwe, ikakhulu eMatabeleland leNkabazwe.
Kulabantwana abanengi abanjengo Natasha Sibanda, abadabuka eMatabeleland, abathi kabanikwa ithuba longengena ezifundweni lezi.
Umqondisi wenhlelo ezitshiyeneyo eMpilo Hospital, uDokotela Solwayo Ngwenya, uthi ibandla leMRP kumele libekwazi ukuthi uhlelo lokudinga abantwana bokufundiswa ukuba ngabongi lwenziwa eHarare.