amalinks wokungena

Bambalwa Abatsha Ababhalisa Amagama Kugwalo Lokuvota


Omunye wababhalise ukuvota kuhlelo oluphakeme oluqhutshwa yikhomishini yeZimbabwe Electoral Commission.

Uzulu obhalisa ukuvota emangweni weGwanda uthi uhlelo lokhubhalisa abazaba lelungelo lokuvota kukhetho lomnyaka ozayo lwabekhomishini yeZimbabwe Electoral Commission (ZEC) kusetshenziswa imitshina yakulez’insuku eye Biometric Voter Registration, oluqalise ngoLwesibili luqhutshwa kahle.

Labo ababhalise ngoLwesibili bathi abala kukhonona lobanje kulokhu kusobala ukuthi balutshwane abantu ababhalisa ukuvota.

UMongameli Mugabe waba ngowokuqala ukubhalisa igama kugwalo lokuvota.
UMongameli Mugabe waba ngowokuqala ukubhalisa igama kugwalo lokuvota.

Abaxoxe leStudio 7 beqeda ukubhalisa ukuvota ngohlelo olutsha olwe Biometric Voter Registration emawofisini awe Tuli Building bathe babhalise kungelahlupho njalo sebekhangelele ukuthi bazavota ngomnyala ozayo.

Osakhulayo, uKacey Tanaka Majoni, oleminyaka yokuzalwa elitshumi lasitshiyagalolunye, uthi selimphuzele ilanga lokuvota.

“Sihambe sayabhalisa emawofisini eGwanda. Besibhalise ngokutshetsha ngoba ubhudi wakhona ebencedisa abantu ababili ngasikhathi sinye. Ngiyathaba ukuthi ngizavota okokuqala empilweni yami. Angikaze ngivote.”

UMnu. Edward Ndlovu obesuka eVumbachikwe Mine, laye obhalisa ngoLwesibili, uthe, “Bathe bengibuza ukuthi ngile ‘proof of residence’ ngabatshela ukuthi angilayo. Babuze ukuth ngihlala ngaphi ngathi ngihlala eVumba … Bangilungisele …”

Esinye isakhumuzi seGwanda, uMnu. Kukhanyakwenkosi Mnkandla, laye uthi sebhalisile njalo semelele ukuthi ayevota.

“Mina ngezwa ngohlelo lokuregister ebandleni langakithi angisoze ngiliqambe kodwa yikho engezwa khona ngohlelo lolu ngazokuya register emawofisini kaRegistrar, ngizimisele kakhulu ukuyavota ngoba kukhona engikufunayo ngevoti yami.”

Inengi lalabo ababhalisayo bakhanya bengabantu abadala njalo kungabesilisa. Abesifazana balutshwana kakhulu.

Kumele ozebhalisa ukuvota alobe igama lakhe emaphepheni eZEC engakathatwa imifanekiso yimitshina yeBVR. Lokhu akutsho ukuthi kuzakwenza avezwe ukuthi uvotele bani.
Kumele ozebhalisa ukuvota alobe igama lakhe emaphepheni eZEC engakathatwa imifanekiso yimitshina yeBVR. Lokhu akutsho ukuthi kuzakwenza avezwe ukuthi uvotele bani.

UNkosazana Monalisa Nkala, osebenza kunhlanganiso yabomama edolobheni leGwanda, uthe, “Aaah! Intanga yami iyadonda, bayadonda ukuyaregister lokudonda ukuvota. Singakhangela okwenzakala kukhetho olwenziwa ngomnyaka ka2013, bathi impumela iyaphuma ifanana ngakho-ke abakuboni ukuthi bavotelani.

“Sizama ukubatshela khathesi ukuthi kusetshenziswa imitshina okuzakwenza ukuthi impumela yokhetho iguquke. Siyabatshela njalo ukuthi ukungavoti kwabo yikho okuzakwenza ukuthi impumela yokhetho ifanane leyeminyaka edluleyo.”

UNkosazana Sichasiselo Ndlovu, umqondisi wenhlanganiso yeCommunity Youth Development Trust, uthi baqhube umhlangano lamantombazana bekhuluma ngodaba lokubhalisa kugwalo lokuvota.

Uthe amantombazana amanengi ayesaba ukuphatheka kwezokuvota ngenxa yodlakela oluvame ukubakhona ngesikhathi sokhetho

“Ukuthi kukhanye eZimbabwe ukuthi sokuyiwa kukhetho, nxa kunje so yebo siyabona ukuthi kuyiywa kukhetho kodwa singabona sokuqala ‘oshort sleeve olong sleeve’ sesikwazi ukuthi kufuze sibe lamabench marks sithi lokhu asikufuni ukwenzela ukuthi lathi siphatheke kukhetho oluzayo. Khathesi siya register sifuna ukuthi siregister ngendlela esiyifunayo ukuze umuntu ayevota ngenhliziyo yakhe”

Uhlelo lokubhalisa ukuvota seluqalile ukubhoda ngeziqinti njalo okwakathesi izisebenzi zekhomishini ebona ngezokhetho elizweni, eye Zimbabwe Electoral Commission iZEC zibikwa zisabalele eziqintini ezinengi zelizwe okugoqela eziseduzane le Gwanda ezifana leInsiza laseMzingwane.

Facebook Forum

XS
SM
MD
LG