amalinks wokungena

Breaking News

Bamiswa Umsebenzi Abongi Abangalandeli Isinqumo Sikahulumende Sokuthi Basebenze Insuku Ezinhlanu Ngeviki


Abongi bathi uhulumende kabaphathi ngemfanelo.

Abongi bezibhedlela zikahulumende koBulawayo, sebemisiwe umsebenzi ngemva kokwala ukusebenza okwensuku ezinhlanu ngeviki besithi iholo labo aleneli ukuthi bahambe insuku ezedlula ezimbili abazisebenzayo. Uhulumende yena uthi usethatha isinqumo sokufaka abezempilakahle abangaphansi kwezomvikela ezibhedlala, esithi lokhu kuyinto ehlala isenziwa nguhulumende nxa abongi bekhalale umsebenzi.

Sekungamaviki amabili uhulumende ekhiphe umbiko othi akasalandeli isivumelwano asenzayo labongi sokusebenza amalanga amabili, ngakhoke sekumele baqale ukusebenza amalanga amahlanu ngeviki. Abongi bona bahle bayala ukulandela isiqondiso esitsha lesi besithi abenelisi ukubhadalela indleko yokuya emsebenzini.

Umnumzana Anthony Majongosi umgcinisihlalo wenhlanganiso emele abongi eye Zimbabwe Nurses Association esibhedlela seUnited Bulawayo Hospital uchasisa ngokumiswa kwabo umsebenzi.

“Khathesi sibona ama hospitals esinika incwadi zokuthi sihambe ku hearing ngendaba yokuthi sayala ukwenza ama 5 days lawana. Khonapho sibona iUBH yodwa kuyiyo e suspender abantu emsebenzini yathi umuntu wonke oyalileyo ukusebenza 5days u suspended njalo le salary kayitholi. So sesilindele ukuhamba ku hearing sizwe ukuthi bayathi.”

Uqhubekela phambili uMajongosi echaza ukuba kungani bekhethe ukusebenza amalanga amabili ngeviki.

“Thina sithi sifuna ukusebenza ama 2 days ngendaba yokuthi imali yethu ayikwani ukuthi sihambe emsebenzini for 5days. So asikwazi ukuthi igovernment leyi ifuna ukwenzani sibona i victimizer abantu, angikwazi ukuthi ifuna ukusenzani. Khathesi ezibhedlela akula ama nurse akwanayo kule shortage ngendaba yokuthi abantu ba suspended.”

Umkhokheli weZINA, umnumzana Enock Dongo uthi kuyabadanisa ukuthi uhulumende ukhethe ukumisa abanye abongi umsebenzi engazange abaphendule kuzikhalazo zabo.

“Kuze kube lamuhla akula mpumela ekhona nxa sikhangelane lendaba yeholo kungakho abongi bengenelisi ukuya emsebenzini. Ngeke benelise ukuhamba amalanga amahlanu ngeviki ngenxa yalokhu. Indaba yokupha abantu incwadi zokuthonisiswa kwabongi, kulusizi ukuthi uhulumende sethethe leyi indlela engekho emthethweni njalo sicabanga ukuthi kufanele uhulumende enze okufaneleyo. Akula muntu obengayi emsebenzini, wonke umuntu ubelandela isinqumo esasikhona phambilini ngakho ukuthonisiswa ngoba abantu bengaya amalanga amabili emsebenzini asazi ukuthi uhulumende usebenzisa wuphi umthetho ukuthonisisa abongi”

Unkosikazi Sihle Dlodlo umhlali wakoBulawayo osesibhedlela seUnited Bulawayo Hospital uthi sebencedwa yilabo abafundela ukonga ngoba abongi besilela.

“Sihlangana lobunzima lapho siphathekile ngoba ukuthi uthole usizo ngoba ama nurse emalutshwane esibhedlela. Kuba ngcono khonokhu nje ngoba kulama student nurses yiwo asinceda lapha lalapha. Esikukhalazayo yikuthi uhulumende angenele nxa kuyimali afunwa ngo nurse akukhulunyiswane kudingwe indlela ngoba impilo zabantu ziqakathekile kakhulu ngeke uthenge umphefumulo womuntu nxa sulahlekile.”

Umqondisi wesibhedlela se United Bulawayo Hospital udokotela Narcisius Dzvanga wenqabe ukuphendula imibuzo ethi laye uyisiqhatshwa kungakho engela mandla okuchaza ukuba kuqhubekani esibhedlela seUBH, wedlulisela imibuzo kuziphathamandla zikahulumende.

Umgcinisihlalo webhodi yezisebenzi zempilakahle I Health Services Board, umnumzana Paulinus Sikosana wenqabe ukuthatshwa ilizwi kodwa uchaze ukuba zonke izisebenzi zikahulumende kufanele zisebenze amahola angamatshumi amane ngeviki kungakho labezempilakahle kufanele babuyele ekusebenzeni amalanga amahlanu ngeviki. Ugcizelele ngokuthi ayisikho kokuqala ukuba uhulumende afake abezempilakahle abangaphansi kogatsha lwezomvikela ezibhedlela, kuyinto ehlala isenziwa nxa abongi bekhalale umsebenzi kumbe kulendingeko yokuba bancedise ezibhedlela.

USikhosana utshele iphephandaba leHerald ukuthi abongi abedlula inkulungwane (1,032) bakhitshwe kuluhlu lweholo kuthi abanye njalo abedlula inkulungwane-1,280 bazaqala ukumiswa phambi kwabaqatshi babo besetheswa umlandu wokungalandeli isinqumo sikahulumende. Abongi laba balakho ukunikezwa amacontract amafitshane awe Fixed Term okuzamele bahlale bewasayina kakutsha nxa engaphela.

Ngenyanga edlulileyo abongi bathole iholo elingange nkulungwane ezilitshumi lasikhombisa -ZWL $17 000 kanye leyegcikwane le Corona engangamadola eMelika angamatshumi ayisikhombisa lanhlanu USD$75. Abongi bathi iholo leli aleneli ukuba bahambe amsebenzini amalanga amahlanu kungakho besithi kabenelisi ukuya emsebenzini hatshi ukuba bakhalale umsebenzi.

Udaba lwabongi bakoBulawayo asebemiswe umsebenzi siluphiwa nguBathabile Masuku
please wait

No media source currently available

0:00 0:06:26 0:00

Facebook Forum

XS
SM
MD
LG