Abomanyano wenhlanganiso zemhlubulweni weMaNdebeleni eyeMatabelelend Forum sebesukumele phezulu bezama ukunceda odokotela labongi abalahlekelwe yimpahla etshiyeneyo esibhedlela seMpilo kulandela ukulumatha komlilo ovuthayo otshise izindlu lapho abahlala khona.
Inhlanganiso le inike odokotela labongi amafutha okupheka, impuphu, amasepa, uchago lokunye.
UNkosikazi Samukeliso Khumalo, obemele iMatabeleland Forum, uthi bazama ukunceda abehlelwe yingozi le ebhidlize izindlu zezisebenzi.
Olwela amalungelo oluntu, uMnu. Ndodana Moyo, uthi kulusizi ukuba abezempilakahle behlelwe yingozi yomlilo ovuthayo.
Umuntu oyedwa ulimele engozini le kwathi omunye wahotsha intuthu yomlilo obuvutha okwethusayo. Iziphathamandla zesibhedlela lesi zithi ababili laba bazaphepha ngokuya kwesikhathi.
Abahlala ezindlini ezitshileyo bathi babone umlilo ebhokisini lentambo eziletha amandla kagesti ezindlini zabodokotela labongi.
Uhlangothi olubona ngezokucitshwa komlilo kukhansili yakoBulawayo, olweFire Brigade, lubikwa ukuba lusahlolisisa imbhangela yomlilo lo.
Umonakalo odalwe ngumlilo otshise izakhiwo eMpilo Hospital ufika isisindo sokuzinkulungwane ezingakhulu amahlanu zamadola eMelika – US$500,000.