Indlala lokusilela kwamanzi ludubo olukhulu olubhekane lezakhamizi zeBrunapeg eMatabeleland South kodwa ukungabi lesithupha kanye lephepha lokuzalwa luhlupho olwedlula indlala lokusilela kwamanzi kulumango.
Kunje inengi labantu abalelungelo lokuvota balakho ukungenelisi ukubhalisa ukuvota phansi kohlelo lweBiometric Voter Registration olusebenzisa imitshina yakulezi inzuku.
Bekhuluma ngemva komhlangano oqoqwe libandla leZAPU emavinkilini eBrunapeg, izakhamizi zesiqintini seMangwe zithi indlala lokusilela kwamanzi bayakubona kodwa ukungabi lezithupha kanye lamabirth certificate kubenza bezibone bengasobantu ngoba kungelanto abayenelisa ukuyenza empilweni.
Abantwana labadala kuyafanana, abanye baze bafike esibangeni sokuthatha loba ukwenda bengela zithupha okuphinda kudale ubunzima kulabo abazelweyo. Bachaze ukuba ukuthatha isithupha leBirth Certificate kuyabadulela ngoba abalamali njalo abasebenzi kuthi lomango okusuka eBrunapeg besiyathatha izithupha ePlumtree mude noma bengaze bayefika babhekana lenkinga ezinengi ezibenza bacine bedela ukuba lalezoncwadi.
Osakhulayo uHonest Nleya osuka koManinji uthe kala sithupha lebirth certificate abazali bakhe babhubha njalo abantu abangaba ngabafakazi bokuthi athole lezoncwadi bakude.
UMlisa weNgulubeni, uMnu. Peter Tshuma uthe kunzima ukuthathela abantwana incwadi zokuzola ecela uhulumende ukuba angenele. uthe lendleko ezikhona zenza kubenzima ukuthatha incwadi ngoba ziyahanjelwa.
Isakhamuzi seBrunapeg uNkosazana Jeritha Dube uthi kunzima ukuthola ubufakazi uma uthe wafelwa njalo lemali iluhlupho ukuthi abantu beye ePlumtree ukuyathatha incwadi zokuzalwa.
UNkosikazi Regina Gumede uthe usasemutsha kodwa ulohlupho lokutholela umntwana amzala eGoli incwadi yokuzalwa ethi lalapho besiya ekuvoteni abantwana bazakwehluleka ukubhalisa ukuvota.
UNompilo Sibanda ucele uhulumende ukuba ananzelele ukuba inengi labantwana abafelwa ngabazali abalancwadi zokuzalwa.
UMnu. Talent Ndebele uthe laba abazalelwa eGoli balobunzima obukhulu ethi uhulumende kangenele.
UNkosikazi Otillia Ngwenya, okhankasela ukuba ngukhansila kuWard 8 eMangwe, uthe abasakhulayo labadala abalancwadi zokuzalwla lezithupha ethi ukubhalisa ukuvota kuzabanzima kunengi labantu.
Uhlupho lokuthola incwadi zokuzalwa lezithupha ludubo olukhulu eBrunapeg, inengi labantu lithi kuzabalukhuni ukuphatheka kuhlelo lokubhalisa ukuvota kanye lokuvota.