Kulabantu abafika phose ikhulu, 95, ababanjwe umkhuhlane weCovid-19 eZimbabwe izolo njalo akekho obhubhileyo.
Ugatsha lwezempilakahle luthi abangamatshumi amahlanu lanhlanu babantu laba ngabakoBulawayo.
Abangamatshumi amabili lantathu ngabeMashonaland East. KulabeMidlands njalo ayisithupha, ababili beMasvingo, oyedwa weMashonaland West, abathathu beMashonaland East kanye labahlanu beHarare.
Kulabalikhulu elilamatshumi amahlanu lane, 154, abatholakale sebepholile. Asebebanjwe umkhuhlane lo elizweni lonke selokhu waqhamukayo sebengu-10129 kuthi asebepholile sebengu-8643.
Asebefile bangu-277 njalo abalokhe begula bangu-1209.
I-Bulawayo yiyo ekhokhelayo ngabantu abagulayo abangu-516 ilandelwa yiMatabeleland South elabantu abangu-148.
I-Mashonaland West ile-139 ilandelwa yiHarare elabangu-134. I-Matabeleland North yiyo elabantu abanengi abafunyanwe sebepholile izolo abangu-143 njalo isisalelwe ngabantu abangu-53 kuphela abagulayo.
Idolobho lakoBulawayo yilo elihamba phambili ngababanjwa lumkhuhlane kulezinsuku kanye labafayo.
Abanye abahlala kulelidolobho batshele lumsakzo ukuthi kunzima ukulandela iziqondiso zokwenqabela ukumemetheka kwalumkhuhlane ezifana ukuqhelelana izikhala ngoba bayabe bedinga indlela zokuziphilisa.
Indawo ezilokuminyaka okukhulu zigoqela lapho okugadelwa khona amabhasi, lapho okukhiwa khona amanzi lasendwendweni zamabhanga.
Isakhamuzi sakoBulawayo uMnu Edwin Ndlovu utshele iStudio 7 ukuthi okuhluphayo kulelidolobho yikuthi abanye bayavumela ukuhlala lezihlobo zabo eziyabe zivele ikakhulu kweleSouth Africa zingazange zihlolwe umkhuhlane lo ekungeneni kwazo elizweni.
