amalinks wokungena

Breaking News

Baqhinqa Isililo Besithi uMnangagwa Kangenele Kudaba Lokudilizwa Kwezindlu


UMnu. Marufu Mandewere umele abantu bedolobho leChitingwiza abadilizelwa imizi yabo yikhansili.

Abamele izakhamizi zeChitungwiza ezibhekane lokudilizelwa imizi yikhansili bathi uhulumende kaMongameli Emmerson Mnangagwa kumele angenele kuloludaba olwenziwa yiziphathamandla zedolobho leli ezisebenza okungekho emthethweni.

Bathi kumele uMnangagwa asukumele phezulu ngoba sebedubeke okumangalisayo abantu okuthiwa balemizi eyakhiwe endaweni ezingekho emthethweni.

izakhamizi ezithwele nzima ...
izakhamizi ezithwele nzima ...

Abadlela evalweni bagoqela uNkosikazi Nomatter Sahumani othi kuzwisa ubuhlungu ukuthi ikhansili ifuna ukudiliza imizi yabo.

Omele izakhamizi ekunhlanganiso yeChitungwiza-Manyame Residents’ Associaton, uMnu. Marvellous Khumalo, uthi kwephula inhliziyo ukubona ikhomishini ephethe ikhansili le izama ukubhidliza imizi yabantu abanjengo Nkosikazi Sahumani.

Izakhamizi lezi ziphiwe amahola angamatshumi amane lasificaminwembili – 48 hours – ukuthi ziphume ziphele emizini yazo okumele idilizwe.

UKhumalo uthi abantu laba sebefela amafufu njengegundwane njengoba kukhanya babedlelana lohulumende kaMnu. Robert Mugabe owasuswa esikhundleni nguMnu. Emmerson Mnangagwa encidiswa libutho leZimbabwe.

UMnu.Marvellous Khumalo, uMnu. Marufu Mandewere labanye abahlangane lentathelizindaba eHarare.
UMnu.Marvellous Khumalo, uMnu. Marufu Mandewere labanye abahlangane lentathelizindaba eHarare.

UKhumalo uthi makudingwe ezinye indlela zokululungisisa loludaba.

Ugcizelele esithi ikhomishini yeChitungwiza, eyakhethwa ngesikhathi uMugabe esesikhundleni, isebenza okungekho emthethweni.

UMnu. Marufu Mandewere, igqwetha elimele izakhamizi lezi, uthi bekukhangelelwe ukuthi imizi le ibhidlizwe lamuhla.

UMandewere uthi ikhansili iyabe isephule umthetho ingakwenza lokhu ngoba usethole usekelo emthethwandaba lokuvimba ukuthi ingabhidlizi imizi yabantu.

Uphinde wathi isisekelo sombuso welizwe kasivumeli ikhansili kanye lelizwe leZimbabwe ukuthi abantu badilizelwe imizi bengakanikwa indawo okumele behlale khona.

Kasenelisanga ukukhulumisana leziphathamandla zekhansili kanye lesikhulumeli sikaMnangagwa.

Facebook Forum

XS
SM
MD
LG