amalinks wokungena

Breaking News

Bathi Kazisukelane Abaqeqetshi Bamaqembu Enguqu eZimbabwe


Abaqeqetshi bomdlalo wenguqu esigabeni saphezulu esePremier Soccer League bathi balinde ngamehlo abomvu ukuba asukelane amaqembu adlala esigabeni lesi.

Ukuphenduka kwemidlalo yenguqu kwele Zimbabwe kuyindaba esegudwini kulezinsuku ngemva kokuphuma kwemibiko ethi uhulumende uthe inhlanganiso ye Zimbabwe Football Association kayitsho ukuba kungahlelwa njani ukuba kudlalwe ngendlela evikelekileyo njengoba kulomkhuhlane we Covid – 19.

Umqeqetshi weqembu le Herentals u Kumbirai Mutiwekuziva uthi kufanele ukuba imidlalo iqale ngoba bebanengi abantu abaphila ngomdlalo wenguqu.

“Yebo kambe sibanjwe entanyeni kodwa kungaba kuhle ukuba imidlalo yenguqu iphenduke ngoba yilapho abanengi abathola khona ukuziphilisa.

Sekusele kithi abaqeqetshi bamaqembu ukuba silungise amaqembu azancintisa anqobe ngesikhathi esinzima esingaka. Lokhu akusoze kube lula ngoba isikhathi samalungiselelo sincane kodwa kuzamele sisebenze ngokukhona,” kutsho uMutiwekuziva.

Umqeqetshi weqembu le Triangle uTawurayi Mangwiro uthi yena isifiso sakhe ngesokuba imidlalo ingaqala iqembu lakhe liqhube ngcono kulanyakenye.

“Sikhangelele ukuba imidlalo ingaqala sidlale ngcono kulanyakenye lapho esiphutshe imidlalo yeligi sisendaweni yesikhombisa, saphatheka njalo lakumncintiswano we CAF Confederations Cup. Kungaba kuhle lonyaka nxa singaphutsha imidlalo yeligi sisendaweni eziphezu kwengalane kumbe kube yithi esiphakamisa isicoco. Yikho esikukhangelele lonyaka,” kutsho uMangwiro.

Abalandeli bomdlalo wenguqu besebethabe babamanzi ensukwini ezisanda kwedlula ngemva kokuba kube lombiko obuthunyelwe nge Whatsapp usithi uhulumende usethethe isinqumo esokuba ezemidlalo ziphenduke kodwa kungabi labantu abedlula amatshumi amahlanu ezinkundleni.

Inhlanganiso ye Sport and Recreation Commission ize yachazela abantu ukuba lowombiko ngokhutshwe nguhulumende wase Botswana okutsho ukuba kwele Zimbabwe ezenguqu zizaqala nxa uhulumende engasuthiseka ngenhlelo azaziphiwa yinhlanganiso ye Zifa.

Imidlalo yenguqu kwele Zimbabwe imiswe ngenyanga kaMbimbitho ngemva kokumemetheka komkhuhlane we Covid – 19.

XS
SM
MD
LG