amalinks wokungena

Breaking News

Batshe Amathe Abantu Ngokubhubha Kuka Tsvangirai


Indaba zemfa yalowo obengumkhokheli webandla leMDC-T, uMnu. Morgan Tsvangirai, isilethe usizi kwabanengi yabatshiya inhliziyo zidabukile.

UTsvangirai ubhubhele kwesinye isibhedlela seJohannesburg ngoLwesithathu ngemva kokugula okwesikhathi eside ngomkhuhlane wemvukuzane yamathumbu.

Ngesikhathi iStudio 7 isethekelela endlini yomunye wamadodana kaTsvangirai lapho imuli ebuthene khona eRandburg eJohannesburg, kwele South Africa, umumo ubuzwisa ubuhlungu, kugcwele usizi lokuhlulukelwa.

UMnu. Collins Tsvangirai, umnawakhe kaMorgan Tsvangirai, uthe umuyi kalwisanga kuphela umbuso woncindezelo, kodwa ulwenzima lomkhuhlane wemvukuzane ocine usumthethe.

“Sidabuke kakhulu ndawonye njengemuli yeZimbabwe. Sidabuke kakhulu ndawonye njengemuli yeMDC. Umfowethu ugulile. Uthe ngemva kokuhlinzwa okwakuqala ngeza ngazombona. Wayesizwa ubuhlungu. Uthethe isikhathi eside egula.”

Isizalwane seZimbabwe esaziwa kakhulu kwezokulwela amalungelo oluntu, uMnu. Dewa Mavhinga, uthi umuyi uzasala ekhunjulwa kakhulu ngokungafuni ngitsho umuntu ohlukumeza amalungelo abanye.

“IZimbabwe yonke iyakhala silahlekelwe ngubaba uTsvangirai. Bekungumuntu othanda abantu, olwela amalungelo abantu beZimbabwe. Umuntu ole courage kakhulu. So, siyakhala ngemfa kaTsvangirai. UTsvangirai bekuliqhawe lamaqhawe.”

Osebenza njengomeli weMDCT kwele South Africa, uMnu. Austin Moyo, uthi uTsvangirai uyidlalile eyakhe indima sekusalele abaphilayo.

“Sidumele kakhulu ngokuhamba kwenkokheli yethu uMorgan Tsvangirai. Siyamkhumbula uTsvangirai la akhona. Nathi esisele emuva sizosala sibambane siphakamise kakhulu abantu baseZimbabwe, sibeke eceleni izinto eziphathelene lokuphakamisa ubuqu bomuntu kuphela eyedwa.”

UMnu. Solomon Chikowero, osebenze lomuyi ekubunjweni kweMDC ngo1999, uthi uyilokhu ayikho khona ngenxa kaTsvangirai.

“Kumina kimi uMorgan ngingathi ngubabami, ngutitshala wami, ngumentor wami, ngu instructor or icon. Ubengumuntu wokuthi even lingalwa ekuseni, emini uzokubiza futhi ethi wozalapha liqalise ukukhuluma ukuthi senza kanjani sihamba kanjani.”

NgoMgqibelo isidumbu sizathwalelwa ekhaya besekusiya lungiselelwa umgcwabo ozaqhutshwa ngoMqibelo ozayo mhlaka 24.

XS
SM
MD
LG