amalinks wokungena

Breaking News

Bayahlatshwa Ngobunengi Ijekiseni yeCovid-19 koBulawayo


Abantu bekudwendwe lokuhlatshwa ijekiseni yeCovid-19 eNkulumane Clinic koBulawayo.
Abantu bekudwendwe lokuhlatshwa ijekiseni yeCovid-19 eNkulumane Clinic koBulawayo.

Uhlelo lokuhlatshwa kwabantu abaleminyaka ephezu kwelitshumi lasitshiyangalombili, 18 years, ijekiseni yeCovid-19 oluqale koBulawayo ngoMvulo beluqhubeka ngoLwesibili kulendwendwe endaweni ezinengi.

Amajekiseni lawa atholakala emakilinika ekhansili kanye lasezibhedlela ezibalisa eseUnited Bulawayo Hospitals, eseMpilo kanye leseIngutsheni.

Elizweni lonke kubhubhe abantu abangamatshumi amahlanu lanye, 51, ngoMvulo njalo kwatholakala abedlula inkulungwane ezimbili, 2,661, belomkhuhlane lo.

Abahlatshwe ijekiseni yakuqala bangu30,332 kuthi abahlatshwe eyesibili bangu10,139.

Lumsakazo ubhonde ngezinye zendawo lapho obekuhlatshwa khona abantu koBulawayo wathola abantu behlatshwa ngobunengi.

Omunye obekudwendwe nguNkosazana Talent Tshuma yena othe lanxa abantu behlatshwa, okudanisayo yikuthi abantu batshona besendwendweni.

“Kulungile ukuthi abantu behlatshwe kodwa indlela okwenzakala ngayo iyadina ngoba bayathi kule-number yabantu okumele bahlatshwe, khonapho abantu bayabe begcwele,” kutsho uMaTshuma.

“Abanye ngababuya bezongenela; kuyavukelwa ekuseni sitshone silindile kwesinye isikhathi ucine ungasanelisanga ukuthi uhlatshwe.”

Omunye okhulume leStudio 7 nguMnu Thulani Dlamini, yena othi: “Indawo zokuhlabela abantu kazibe zinengi, for instance ema-grosa okulabantu abanengi kodwa kungabi sema-grosa kuphela kodwa kube sendaweni ezilabantu abanengi njengoba umkhuhlane lo umemetheka.”

Bebehlatshwa ngobunengi abantu eMaqhawe Clinic eseNkulumane ngoLwesibili.
Bebehlatshwa ngobunengi abantu eMaqhawe Clinic eseNkulumane ngoLwesibili.

UNkosikazi Yolanda Moyo yena uthe ukungalandelwa kuhle kweziqondiso zokwenqabela lumkhuhlane yikho okwenza umemetheke ngamandla.

"Umkhuhlane weCovid-19 khathesi usubhahile kakhulu kithi lapha. Engikubonayo yikuthi lanxa ungaze ubanjwe u-positive akula ma-strict measures afakwayo. Uyaphuma uyezigadela umtshova ngoba kungela enye i-transport ongayisebenzisa,” kutsho uMaMoyo.

Umphathintambo wesabelo seBulawayo Metropolitan, uNkosikazi Judith Ncube ukhuthaze abahlali balelidolobho abaphezu kweminyeka elitshumi lasitshiyangalombili, 18 years, ukuthi baphume ngobunengi bayehlatshwa.

“Kusukela last week kuhlatshiwe sibili abantu abayi7,000, engxenye bayedlula kancane. Ama-clinic onke asevuliwe kusenzelwa ukuthi lama-residents ahlatshwe khonapha,” kutsho UNkosikazi Ncube

NgoMvulo koBulawayo, kubhubhe abantu abalitshumi lanye, 11, ngeCovid-19 njalo kwatholakala abangamakhulu edlula amabili, 219, belomkhuhlane lo.

please wait

No media source currently available

0:00 0:03:27 0:00

XS
SM
MD
LG