Abantu abanengi bathi uMongameli Emmerson Mnangagwa uyazehlulekela ekubuseni ngenxa yokuthi akufezekanga ngitsho lakancane okunengi akuthembisa uzulu ngesikhathi kususwa owayengumongameli uMnu. Robert Mugabe esikhundleni.
Abantu abanengi batshele umsakazo weStudio 7 ukuthi sokunzima okumangalisayo ukuphila eZimbabwe nxa kuqathaniswa lesikhathi kusabusa uMugabe.
Omunye wabalombono lo nguMnu. Effort Ncube wenhlanganiso ebonga amalungelo abathengi eyeNational Consumer Rights Association.
"Isimo selizwe ngemva kuminyaka lokhe kwangena uhulumende omutsha siyethusa kakhulu, ikakhulu kwezokudla lokuphila nje jikelele, sokwakhuphuka intengo yesinkwa, itshukela, amahlamvu etiye, isepa lokunye okunengi. Akulanto ethengekayo. Ngakho emuntwini weZimbabwe owayekhangelele ukuthi kuzoba lenguquko wethuke kakhulu ngoba impilo ibuhlungu ukwedlula lokho esasilakho sisaphila ngaphansi kuka Mugabe, sebuphindwe kanengi ubuhlungu. Lusizi kikho konke."
UMnu. Thembelani Dube ongumbalisi uthi eminyakeni le, emibili kunengi osokuguqukile, impilo kuzulu isinzima ngamandla.
“Nxa siqathanisa uNovember ka 2017 kusiya kuNovember lonyaka kunengi osokuthe kwaguquka. Ngo2017 abantu bebethenga izinto bezitshiphile njalo bezithengeka bebeleholo elithengayo kodwa khathesi iholo labo alisathengi njalo ungaqathanisa futhi ma sesikhangale khathesi imitshova isidula abantu sebetshona emabhasini belayinile.
“Kodwa khathesi abantu bakhululekile ukukhuluma yikho esingathi kuhle kodwa nje abantu babesesaba ngo2017 kusiya emuva. Khathesi bakhululekile yikho esingathi kupositive loba impilo inzima. Ezibhedlela akula madokotela, akula mithi, izisebenzi zizondile phandle la.”
UMnu. Mike Ndiweni, umqondisi wenhlanganiso yeBulawayo Vendors and Traders Association, uthi umumo okhona manje elizweni ayisiwo abantu ababewukhangelele kuhulumende omutsha.
Isakhamuzi sako Bulawayo, uNkosikazi Charity Nxumalo, uthi umehluko okhona nje ngamabhasi.
“Hayi bakithi impilo yakhathesi sesithwele nzima sibili asisakwanisi kuthenga ngitsho lona ipatapata, khathesi ukudla sidla nzima labantwana sidla kanye ngelangala, uyasebenza kodwa akula into ekhanyayo, leholo lakhona alikhanyi. Ungagulelwa ngabantwana ukuthi uye esibhedlela akula abodokotela. Ngesikhathi kusiba lohulumende lo omutsha besicabanga ukuthi kuzoba lomehluko. Hayi mina angiboni mehluko kumbe ngowamabhasi. Sithwele nzima, wona amabhasi singawagada njani singadlanga."
